Fransa, Britaniya və Almaniya liderlərinin Ukrayna ilə bağlı görüşü keçirildi -AÇIQLAMA

24 avqust 2026-cı ildə Fransa Prezidenti Emmanuel Makron, Almaniya kansleri Fridrix Merz və Britaniyanın Baş naziri Endi Börnham Ukrayna ilə bağlı "İstəkli ölkələr koalisiyası"nın görüşünə həmsədrlik ediblər. Görüşdə Ukrayna Prezidenti Volodimir Zelenski də iştirak edib.

Mövzu ilə bağlı Sonxeber.az-a açıqlama verən siyasi şərhçi Züriyə Qarayeva görüşün detallarından danışıb:

"Fransa, Britaniya və Almaniyanın həmsədrliyi ilə keçirilmiş görüşdə Ukrayna üçün ilk növbədə hava hücumundan müdafiə sistemlərinin və uzaqmənzilli zərbə imkanlarının artırılması, silah-sursat istehsalının genişləndirilməsi və maliyyə yardımının davam etdirilməsi ilə bağlı konkret qərarların çıxması gözlənilirdi. Müzakirələrin digər mühüm istiqaməti mümkün atəşkəsdən sonra Ukraynaya veriləcək uzunmüddətli təhlükəsizlik təminatları idi. Eyni zamanda, Rusiyanın müharibəni maliyyələşdirmək üçün istifadə etdiyi kölgə donanmasına qarşı tədbirlərin sərtləşdirilməsi və yeni sanksiyaların əlaqələndirilməsi gündəmdə idi".

Politoloqun sözlərinə görə, bu görüş Moskvaya Avropanın müharibənin uzanmasından yorulsa da, Ukraynaya dəstək siyasətindən geri çəkilmədiyi və Rusiyanın hərbi təzyiqlə istədiyi siyasi nəticəni əldə etməsinə imkan verməyəcəyi mesajını vermiş oldu:

"Könüllülər koalisiyasının gündəliyində təhlükəsizlik təminatları və Rusiyanın müharibə resurslarının məhdudlaşdırılması əsas istiqamətlər kimi göstərilir. ABŞ-ın mövqeyi Avropa liderlərinin qərarlarına ciddi təsir göstərir, çünki Ukraynanın müdafiəsi üçün zəruri olan kəşfiyyat, hava müdafiəsi və bir sıra strateji silah imkanlarında Vaşinqton hələ də əsas tərəfdaşdır. Tramp administrasiyasının müharibəni tezliklə danışıqlar yolu ilə dayandırmaq istəyi Avropanı bir tərəfdən diplomatik həllə hazırlaşmağa, digər tərəfdən isə mümkün razılaşmanın Ukraynanın təhlükəsizliyi hesabına baş tutmaması üçün daha fəal mövqe tutmağa vadar edir".

Z.Qarayeva onu da vurğulayıb ki, Fransa, Britaniya və Almaniya göstərməyə çalışırlar ki, ABŞ-ın siyasətində dəyişiklik baş versə belə, Avropa Ukraynanı tək buraxmayacaq. Lakin Vaşinqtonun hərbi və siyasi iştirakı zəifləyərsə, Avropa ölkələrinin həmin boşluğu qısa müddətdə tam doldurması çətin olacaq. Buna görə görüşün əsas siyasi məqsədlərindən biri də ABŞ-la Avropa arasında Ukrayna məsələsində ortaq xətti qorumaqdır.

Lalə Məmmədova

Telegramda izləyin