Prezidentin Qırğızıstana səfəri işgüzar xarakter daşıyır - AÇIQLAMA

Prezident İlham Əliyevin Qırğızıstana dövlət səfəri iki ölkə arasında münasibətlərin yeni mərhələyə keçməsi baxımından diqqət çəkir.

Bəs bu səfər Azərbaycan-Qırğızıstan münasibətlərinin siyasi və strateji baxımdan inkişafına necə təsir göstərə bilər?

Mövzu ilə bağlı Sonxeber.az-a açıqlama verən politoloq Samir Hümbətov bildirib ki, Azərbaycan Prezidentinin Qırğızıstana səfəri işgüzar xarakter daşıyır.
"Səfərin proqramı tam açıqlanmasa da, əsas məqsədin iki ölkə arasında əlaqələrin inkişaf etdirilməsi olduğu gözlənilir. Səfər çərçivəsində iqtisadi, siyasi və digər sahələrdə əməkdaşlığın dərinləşdirilməsi ilə bağlı müzakirələrin aparılması, həmçinin müəyyən sənədlərin imzalanması mümkündür. Dövlət başçılarının qarşılıqlı səfərlərində əsas diqqət, bir qayda olaraq, ikitərəfli münasibətlərin inkişafına yönəlir və bu baxımdan iqtisadi əlaqələr xüsusi əhəmiyyət daşıyır".

Politoloq bildirib ki, eyni zamanda Azərbaycanın Mərkəzi Asiyada mövqeyinin və nüfuzunun gücləndirilməsi də bu səfərlərin mühüm istiqamətlərindən biridir:

"Azərbaycanın Şərqlə Qərb arasında strateji mövqeyini qoruması baxımından Mərkəzi Asiya ölkələri ilə münasibətlərin inkişaf etdirilməsi xüsusi önəm daşıyır. Qırğızıstanla strateji tərəfdaşlıq münasibətlərinin mövcudluğu da ikitərəfli əlaqələrin daha yüksək səviyyəyə qaldırılmasına və əməkdaşlığın yeni istiqamətlər üzrə genişləndirilməsinə təkan verə bilər".

Röyalə Xəyal

Telegramda izləyin