Azərbaycan Şanxay Əməkdaşlıq Təşkilatı ilə də sıx əməkdaşlıq edir - AÇIQLAMA

"Prezident İlham Əliyevin Şanxay Əməkdaşlıq Təşkilatının (ŞƏT) tədbirlərində iştirak etmək üçün Qırğızıstana işgüzar səfəri kifayət qədər önəm daşıyır. Bilirsiniz ki, hazırda dünyada köklü geosiyasi dəyişmə prosesi gedir. Bu proseslər fonunda müxtəlif beynəlxalq təşkilatlar daha güclü mövqelərə sahib olurlar. Son zamanlar güclənən və sıralarını genişləndirməkdə olan Şanxay Əməkdaşlıq Təşkilatı da bu qəbildəndir".

Bunu Sonxeber.az-a açıqlamasında Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu bildirib.

O, bildirib ki, Azərbaycan Şanxay Əməkdaşlıq Təşkilatı ilə də sıx əməkdaşlıq edir:

"Təşkilatda Çin, Rusiya, Pakistan və s. kimi böyük dövlətlərin təmsil olunması, eyni zamanda Azərbaycanın da təmsil olunduğu dialoq tərəfdaşı ölkələri sırasında Türkiyə, Səudiyyə Ərəbistanı, Misir və s. böyük potensiala sahib ölkələrin yer alması ŞƏT-in perspektivləri barədə aydın təsəvvür yaradır. Ona görə də dövlət başçısının ŞƏT-in toplantısına qatılması əhəmiyyətli hadisədir. Təbii ki, Prezident İlham Əliyev səfər çərçivəsində ikitərəfli görüşlər də keçirir. Dövlət başçısının Ermənistan baş naziri və Qazaxıstan prezidenti ilə görüşü və nəzərdə tutulan digər görüşlər səfərin məhsuldar xarakter daşıdığını göstərir".

Ekspert bildirib ki, ŞƏT-in toplantısının Qırğızıstanda baş tutması Azərbaycan-Qırğızıstan münasibətlərinin inkişafı üçün növbəti müzakirələrin aparılması fürsəti də yaradır:

"İki qardaş ölkə arasında münasibətlərin inkişafı nəzərəçarpacaq səviyyədədir və bu nəticənin əldə olunmasında Azərbaycan Prezidentinin fəaliyyəti xüsusi əhəmiyyətə malikdir. Təsadüfi deyil ki, Azərbaycan və Qırğızıstan prezidentləri tərəfindən çoxsaylı qarşılıqlı rəsmi və işgüzar səfərlər baş tutub. Və bütün səfərlər zamanı iki ölkə arasında münasibətlərin inkişafına təkan verən razılaşmalar əldə olunub. İki ölkə arasında 120-yə yaxın sənədin imzalanması münasibətlərin inkişafındakı dinamikadan xəbər verir".

Telegramda izləyin