Psixoloq seçimi edərkən bunlara diqqət etmək lazımdır - AÇIQLAMA

İnsanlar psixoloq seçərkən yalnız təhsilinə və iş təcrübəsinə deyil, tətbiq etdiyi metodların elmi əsaslarına, etik qaydalara əməl edib-etməməsinə və mütəxəssisin ixtisaslaşdığı sahəyə də diqqət yetirməlidirlər. Peşəkar psixoloqun fəaliyyətində məxfilik, düzgün qiymətləndirmə və müştərinin ehtiyacına uyğun yanaşma əsas meyarlardandır.

Bəs, insan psixoloqun peşəkarlığını, tətbiq etdiyi metodların elmi və etibarlı olub-olmadığını necə qiymətləndirə bilər və psixoloq seçimində hansı məqamlar əsas meyar kimi götürülməlidir?
Mövzu ilə bağlı Sonxeber.az-a açıqlama verən psixoloq Sibel Piriyeva bildirib ki, insanlar psixoloq seçərkən ilk növbədə onun ali təhsilinin olub-olmadığına diqqət yetirməlidirlər.

"Çünki bakalavr təhsili psixoloq üçün baza təhsilidir. Bu baza təhsili olmayan şəxslərin pasiyentləri yanlış istiqamətləndirməsi mümkündür. İxtisas baxımından psixoloq psixologiya və ya təhsildə sosial-psixoloji xidmət ixtisasını bitirmiş olmalıdır. Bundan əlavə, mütəxəssisin peşəkar təcrübəsi, hansı problemlərlə işlədiyi və hansı terapiya metodlarından istifadə etdiyi də araşdırılmalıdır".

Psixoloq bildirib ki, psixoloq koqnitiv-davranış terapiyasından istifadə edirsə, həmin terapiya üzrə müvafiq tətbiq sertifikatının olması vacibdir:

"Çünki terapiya metodunu öyrənməklə yanaşı, psixoloqun superviziya prosesindən keçməsi də əhəmiyyətlidir. Psixoloq seçərkən onun peşəkar fəaliyyətindən əlavə, özünün superviziyadan keçib-keçmədiyinə də diqqət yetirmək lazımdır. Çünki insanlarla işləyən mütəxəssislərin öz psixoloji vəziyyətləri üzərində də işləməsi vacibdir. Ölkəmizdə bəzi psixoloq və loqopedlərin özlərinin müxtəlif psixoloji problemlər daşıması ilə bağlı hallar da mövcuddur".

Onun sözlərinə görə, ABŞ-da psixoloqların müəyyən dövrlərdə superviziyadan keçməsi praktikası mövcuddur:

"Azərbaycanda isə bu istiqamətdə belə sistemin tətbiq olunması faydalı olardı. Psixoloqlar, loqopedlər və ümumilikdə insanlarla işləyən inkişaf mütəxəssislərinin superviziya prosesindən keçməsi onların şəxsi travmalarını pasiyentlərə ötürməsinin qarşısını almağa kömək edə bilər".

Röyalə Xəyal

Telegramda izləyin