Hədsiz artıq çəkinin yaranmasının səbəbi nələrdir? - AÇIQLAMA

Son illər artıq çəki problemi yalnız qidalanma vərdişləri ilə deyil, həyat tərzi, stress, yuxu rejimi və müxtəlif sağlamlıq faktorları ilə də əlaqələndirilir.

Bəzən insan az yediyini düşünsə də, çəkisi artmaqda davam edir. Bu isə artıq çəkinin arxasında başqa səbəblərin olub-olmaması sualını gündəmə gətirir.

Bəs görəsən hədsiz artıq çəkinin yaranmasının səbəbi nələrdir?

Dietoloq Leyla Rəhimova bu barədə Sonxeber.az -a açıqlama verib:

"Hədsiz artıq çəkinin yaranmasının əsas səbəbi, adətən, orqanizmin qəbul etdiyi enerjinin sərf etdiyi enerjidən uzun müddət çox olmasıdır. Lakin bunu yalnız "çox yemək" kimi qiymətləndirmək düzgün deyil. Artıq çəki bir neçə amilin birlikdə təsiri nəticəsində yarana bilər. Qidalanmada yüksək kalorili, şəkərli və yağlı məhsulların, fast-food və şirin içkilərin çox olması çəki artımını sürətləndirə bilər. Eyni zamanda fiziki aktivliyin az olması, uzun müddət oturaq həyat tərzi və yuxu rejiminin pozulması da maddələr mübadiləsinə və iştahın tənzimlənməsinə təsir göstərir.

Bundan başqa, stress və emosional yemək də mühüm amillərdəndir. İnsan bəzən fizioloji aclıq olmadığı halda stress, narahatlıq və ya sıxıntı səbəbindən daha çox qida qəbul edir. Bu vəziyyət xüsusilə şirniyyat və yüksək kalorili qidalara meyli artıra bilər.

Bəzi hallarda isə çəki artımının arxasında hormonal və metabolik problemlər, müəyyən dərmanların istifadəsi və digər tibbi faktorlar dayana bilər. Məsələn, qalxanabənzər vəzinin fəaliyyətinin pozulması çəki artımına səbəb ola bilən amillərdən biridir. Lakin hər artıq çəki halını hormonlarla əlaqələndirmək də doğru deyil.

Əsas məqam odur ki, hədsiz artıq çəkisi olan insan üçün yalnız sərt pəhriz tətbiq etmək problemi həll etmir. İlk növbədə çəki artımına səbəb olan faktor müəyyənləşdirilməli, daha sonra fərdin qidalanması, fiziki aktivliyi, yuxu rejimi və ümumi sağlamlıq vəziyyəti nəzərə alınaraq davamlı plan hazırlanmalıdır. Məqsəd qısa müddətdə çəki itirməkdən daha çox, sağlam və uzunmüddətli nəticə əldə etmək olmalıdır".

Telegramda izləyin