Övladına vitamin verən valideynlərin NƏZƏRİNƏ - XƏBƏRDARLIQ

Uşaqlara vitamin və qida əlavələrinin bir neçə növünü eyni vaxtda vermək onların tərkibində eyni vitamin və mineralların təkrar olmasına və nəticədə gündəlik qəbulun normadan artıqlaşmasına səbəb ola bilər. Xüsusilə A vitamini və dəmir kimi maddələrin yüksək dozada qəbulu sağlamlıq üçün ciddi risklər yarada bilər. Buna görə uşaqlara əlavələrin həkim məsləhəti olmadan verilməsi tövsiyə edilmir.

Bəs, uşaqlara bir neçə vitamin və qida əlavəsini eyni vaxtda vermək nə dərəcədə doğrudur, onların yüksək dozada və nəzarətsiz qəbulu hansı fəsadlara səbəb ola bilər və valideynlər vitamin seçərkən, dozanı müəyyənləşdirərkən nələrə diqqət etməlidirlər?
Mövzu ilə bağlı Sonxeber.az-a açıqlama verən tibb eksperti Adil Qeybulla bildirib ki, uşaqlara eyni vaxtda bir neçə vitamin verilə bilər, lakin bunun həkim tərəfindən təyin olunması vacibdir:

"Vitaminlərin qida maddələri, dərman preparatları və ya qida əlavələri formasında istifadəsi fərqli ola bilər və belə hallarda həkim məsləhəti nəzərə alınmalıdır. Əgər həkim uşağın bir neçə vitaminə ehtiyacı olduğunu müəyyən edərsə, onların birlikdə istifadəsi mümkündür. Lakin vitaminlərin valideynlər tərəfindən özbaşına alınaraq uşaqlara verilməsi düzgün deyil. Hətta D vitamininin çatışmazlığı belə müxtəlif səbəblərlə bağlı ola bilər. Buna görə də vitamin qəbuluna başlamazdan əvvəl həkimlə məsləhətləşmək və mütəxəssisin tövsiyəsinə uyğun hərəkət etmək daha məqsədəuyğundur".

Röyalə Xəyal

Telegramda izləyin