Türk bayrağına tüpürən ingilis turist həbs edildi

Türkiyənin Antalya şəhərinin Alanya rayonunda istirahət edən İngiltərə vətəndaşı otel əməkdaşları ilə mübahisə etdikdən sonra foyedə asılmış Türkiyə bayrağına tüpürdüyü iddiası ilə saxlanılıb.

Sonxeber.az xarici mediaya istinadla xəbər verir ki, hadisə Alanyanın Dinek məhəlləsində yerləşən otellərdən birində baş verib.

Məlumata görə, istirahət məqsədilə otelə gələn 58 yaşlı britaniyalı Stephen Kerr otel əməkdaşları ilə mübahisə edib. İddiaya görə, mübahisədən sonra o, otelin foyesində asılmış Türkiyə bayrağına tüpürüb.

Hadisəni görən otel əməkdaşları dərhal polisə məlumat veriblər. Məlumat əsasında otelə gələn Alanya Rayon Polis İdarəsinin Təhlükəsizlik Bürosunun əməkdaşları Kerr-i saxlayıblar.

Polis şöbəsində tərcüməçi vasitəsilə ifadəsi alınan Kerr-in sənədləşmə işləri başa çatdıqdan sonra Alanya Ədliyyə Sarayına göndərildiyi bildirilib.

Növbətçi Sülh Cəza Hakimliyində ifadəsi alınan britaniyalı turist "Dövlətin suverenlik rəmzlərini alçaltmaq" ittihamı ilə həbs edilib.

Stephen Kerr məhkəmə prosedurlarından sonra Alanya L Tipli Qapalı Cəzaçəkmə Müəssisəsinə göndərilib.

Telegramda izləyin