Başqasının uğuruna sevinə bilməmək paxıllıqdan qaynaqlanır, yoxsa insanın özünü dəyərsiz hiss etməsindən? - AÇIQLAMA

İnsan bəzən başqasının uğurunu gördükdə sevinc əvəzinə içində narahatlıq, qıcıq və ya narazılıq hiss edə bilər.

Xüsusilə də qarşı tərəfin əldə etdiyi nəticə insanın öz həyatı ilə bağlı çatışmazlıqları xatırladırsa, bu hiss daha da güclənir.

Bəs başqasının uğuruna sevinə bilməmək həmişə paxıllıqdan qaynaqlanır, yoxsa insanın özünü dəyərsiz və geridə hiss etməsi də bu reaksiyanın səbəbi ola bilər?

Psixoloq Gülsər Qədirli bu barədə Sonxeber.az -a açıqlama verib:

"Başqasının uğuruna sevinə bilməmək avtomatik olaraq paxıllıq kimi qiymətləndirilməməlidir. Bu hissin arxasında insanın özünü başqaları ilə müqayisə etməsi, özünəinamının aşağı olması, uğursuzluq qorxusu və kifayət qədər dəyərli olmadığına dair düşüncələr dayana bilər. Xüsusilə insan qarşı tərəfin nailiyyətini öz həyatındakı çatışmazlıqların göstəricisi kimi qəbul edirsə, həmin uğur onda narahatlıq və narazılıq yarada bilər.

Mütəxəssisin sözlərinə görə, bəzi insanlar başqasının uğurunu gördükdə "o bacardı, mən isə bacarmadım" düşüncəsinə qapılırlar. Bu zaman diqqət qarşı tərəfin nailiyyətindən daha çox insanın özünü necə qiymətləndirməsinə yönəlir. Yəni problem bəzən başqasının uğurunda deyil, şəxsin özünə verdiyi dəyərdə olur.

Eyni zamanda, uşaqlıqdan davamlı müqayisə edilən, "filankəs səndən yaxşıdır" kimi ifadələrlə böyüyən insanlarda sonrakı dövrlərdə də müqayisə etmə meyli güclü ola bilər. Belə insanlar başqasının nailiyyətini özləri üçün təhlükə və ya məğlubiyyət kimi qəbul edə bilərlər.

Bu hissin yaranması insanı avtomatik olaraq "pis" və ya "paxıl" etmir. Əsas məsələ həmin emosiyanın fərqinə varmaq və onun səbəbini anlamaqdır. İnsan özündə bu reaksiyanı müşahidə etdikdə "Mən niyə onun uğuruna sevinə bilmirəm?", "Bu uğur məndə hansı hissi yaradır?" kimi suallar üzərində düşünə bilər. Əgər bu müqayisə və narazılıq davamlı xarakter daşıyırsa və insanın münasibətlərinə, özünəinamına və gündəlik həyatına təsir edirsə, psixoloji dəstək faydalı ola bilər".

Telegramda izləyin