Ürək üçün faydalı olan 6 dəniz məhsulu

Ürək sağlamlığından narahat olan şəxslər qida rasionuna bəzi dəniz məhsullarını əlavə edə bilərlər. Dəniz məhsulları omeqa-3 yağ turşuları ilə zəngindir. Lakin bəzi növlər ürək sağlamlığı baxımından digərlərindən daha faydalı hesab olunur.

Qaynarinfo xəbər verir ki, "Verywell Health" kardioloqla danışaraq ürək üçün faydalı olan dəniz məhsullarının siyahısını hazırlayıb.

Qızılbalıq

Qızılbalığın 115 qramlıq porsiyasında təxminən 23-25 qram protein var. Tərkibində karbohidrat yoxdur və balıq omeqa-3 yağ turşuları, B12 və D vitaminləri, həmçinin selenlə zəngindir. Qızılbalığın civə miqdarı da aşağıdır.

Siyənək

Siyənək omeqa-3 yağ turşuları, protein və B12 vitamini ilə zəngindir.

Mütəxəssislər duzun miqdarını azaltmaq üçün marinad edilmiş, qurudulmuş, hisə verilmiş və duzlanmış siyənək əvəzinə təzə və ya dondurulmuş balığa üstünlük verməyi tövsiyə edirlər.

Sardina

Sardina siyənəklə eyni fəsiləyə aid olan kiçik balıqdır. O, omeqa-3 yağ turşuları, dəmir və selenlə zəngindir. Bir porsiya sardina gündəlik selen ehtiyacının təxminən 82 faizini təmin edə bilər.

Sardinanın tərkibindəki omeqa-3 yağ turşuları iltihabın azalmasına kömək edə bilər. Balığın yeyilə bilən sümükləri isə kalsium və D vitamini mənbəyidir.

Konservləşdirilmiş sardina alarkən duz miqdarına diqqət yetirmək, su və ya zeytun yağında, az duzlu və ya duzsuz variantlara üstünlük vermək məsləhətdir.

Skumbriya

Skumbriya omeqa-3 yağ turşuları, protein və dəmirlə zəngindir. Bəzi skumbriya növlərində civənin miqdarı aşağıdır. Lakin kral skumbriyasında metilcivənin miqdarı yüksək ola bilər.

Alabalıq

Alabalıq omeqa-3 yağ turşuları ilə zəngin yağlı balıqdır. Tərkibində selen, B12 və D vitaminləri var. Civə miqdarı da aşağıdır.

Ançous

Ançous protein, omeqa-3 yağ turşuları, dəmir, kalsium və selenlə zəngindir.

Konservləşdirilmiş ançousda duzun miqdarı yüksək ola bilər. Buna görə təzə və ya qurudulmuş alternativlərə üstünlük vermək mümkündür.

Telegramda izləyin