Nəqliyyatın sıxlığını azaltmaq üçün nə etmək lazımdır? - AÇIQLAMA

Yeni tədris ilinin başlaması ilə şəhər yollarında, xüsusilə məktəblərin yerləşdiyi ərazilərdə nəqliyyat sıxlığının artması gözlənilir. Səhər saatlarında valideynlərin övladlarını məktəbə aparması, məktəb qarşısında avtomobillərin nizamsız saxlanılması və piyada hərəkətinin artması bu ərazilərdə həm tıxac, həm də təhlükəsizlik baxımından əlavə risklər yarada bilər.

Bəs, 15 sentyabrda məktəblərin ətrafında nəqliyyat sıxlığının və mümkün təhlükəli vəziyyətlərin qarşısını almaq üçün hərəkət necə təşkil olunmalıdır, sürücülər və valideynlər avtomobillərini harada və necə saxlamalı, tıxacların minimuma endirilməsi üçün hansı qaydalara xüsusilə diqqət etməlidirlər?
Mövzu ilə bağlı Sonxeber.az-a açıqlama verən nəqliyyat eksperti Aslan Əsədov bildirib ki, 15 sentyabrdan sonra məktəblərin başlaması ilə Bakıda nəqliyyat vasitələrinin və insan axınının artacağı gözlənilir.

"Hazırda da Bakıətrafı ərazilərdən və şəhər ətrafındakı qəsəbələrdən şəhərin mərkəzinə doğru kifayət qədər çox sayda nəqliyyat vasitəsi hərəkət edir. Gün ərzində bu nəqliyyat vasitələri şəhərə daxil olur, axşam saatlarında isə şəhərdən çıxırlar. Məktəblərin başlaması ilə bu axına tələbələri və iş mövsümü ilə əlaqədar hərəkət edən şəxsləri də əlavə etsək, kifayət qədər böyük bir insan kontingenti yaranır. Bu isə öz növbəsində böyük insan axını və nəqliyyat vasitələrinin sayının artması deməkdir. Nəticədə nəqliyyat infrastrukturu üzərində əlavə yük yaranır. Tıxacların minimuma endirilməsi üçün ən optimal variant hər kəs üçün eyni dərəcədə əlçatan marşrut sisteminin formalaşdırılmasıdır. Hər kəs üçün əlçatan nəqliyyatın və infrastrukturun olması bu istiqamətdə mühüm töhfə verə bilər".

Röyalə Xəyal

Telegramda izləyin