Azadlıq heykəlinin məşəli 110 ildir bağlıdır: 1916-cı ildə nə baş verib?

Hər il milyonlarla turist Nyu-Yorkdakı Azadlıq heykəlini ziyarət edir, lakin onun məşəlinə qalxmağa icazə verilmir. Abidənin ən yüksək müşahidə meydançasına giriş hələ 1916-cı ildə bağlanıb. Bu gün turistlər Azadlıq heykəlinin tacına qədər 162 pillə qalxa bilirlər, lakin məşələ aparan yolu artıq 110 ildir davam etdirə bilmirlər.

Qaynarinfo "Spacedaily" nəşrinə istinadən xəbər verir ki, qadağaya 1916-cı ilin yayında heykəlin yaxınlığındakı Blek-Tom anbarlarında baş verən partlayış səbəb olub.

Həmin vaxt ABŞ Birinci Dünya müharibəsində bitərəfliyini qoruyurdu, lakin Böyük Britaniya və Fransaya böyük həcmdə döyüş sursatı göndərirdi. Blek-Tom anbarlarında müttəfiqlərə göndərilməsi nəzərdə tutulan təxminən 900 ton döyüş sursatı və partlayıcı maddə saxlanılırdı.

Gecə yarısı anbarların ərazisində yanğın baş verib və ardınca güclü partlayış meydana gəlib. Partlayışın təsirləri böyük məsafədə hiss olunub. Nyu-Yorkda minlərlə pəncərə sınıb, qəlpələr liman ərazisinə yayılıb, Ellis adasının sakinləri isə təxliyə edilməli olub.

Azadlıq heykəli partlayış yerindən təxminən 800 metr məsafədə yerləşirdi və zərər görüb. Qəlpələr heykəlin mis üzlüyünə dəyib, xüsusilə məşəlin yerləşdiyi qaldırılmış qol ciddi şəkildə zədələnib.

Nə üçün turistlərin məşələ qalxmasına icazə verilmir?

Məşəldə yaranan zədələr ona aparan keçidin bağlanmasının son səbəbi olub. Bununla belə, Azadlıq heykəlinin qolu partlayışdan əvvəl də konstruksiyanın ən mürəkkəb hissələrindən biri hesab edilirdi.

1916-cı ildən sonra məşələ aparan pilləkənlər ziyarətçilər üçün bir daha açılmayıb. Abidənin sonrakı bərpa işlərindən sonra da bu məhdudiyyət qüvvədə qalıb.

Bu gün məşəlin içərisinə yalnız orada yerləşən avadanlıqlara texniki xidmət göstərməli olan Milli Parklar Xidmətinin əməkdaşları qalxa bilirlər.

Azadlıq heykəlinin orijinal məşəli də artıq əvvəlki yerində deyil. 1980-ci illərdə aparılan genişmiqyaslı bərpa işləri zamanı 1886-cı ildə hazırlanmış orijinal məşəl qızılla örtülmüş yeni mis məşəllə əvəz edilib.

1886-cı il istehsalı olan orijinal məşəli hazırda Azadlıq adasında yerləşən Azadlıq heykəlinin muzeyində görmək mümkündür.

Telegramda izləyin