"Kurtlar Vadisi Pusu" ilə bağlı da istintaq başladılıb - VİDEO

Türkiyənin keçmiş MİT müşaviri Kaşif Kozinoğlunun həbsxanada şübhəli ölümü ilə bağlı araşdırma çərçivəsində "Kurtlar Vadisi Pusu" serialı da istintaq obyektinə çevrilib. İstanbul Respublika Baş Prokurorluğu serialdakı bəzi səhnə və simvolların mümkün əlaqələrini araşdırır.

Sonxeber.az xarici mediaya istinadla xəbər verir ki, Kozinoğlunun ölümündən iki gün əvvəl yayımlanan bölümdə onu simvolizə etdiyi düşünülən "Kazım Kaşifoğlu" obrazının öldürülməsi diqqət çəkib. Bu səbəbdən serialın ssenaristləri prokurorluqda ifadə veriblər. Ssenaristlər səhnənin Kozinoğlunun ölümü ilə eyni vaxta düşməsinin təsadüf olduğunu bildiriblər.

Araşdırma zamanı serialda görünən "FG" nömrə nişanlı avtomobilin də hər hansı mesaj daşıyıb-daşımadığı yoxlanılır.

Bundan başqa, serialın köhnə bölümlərindən birində yer alan səhnə də yenidən gündəmə gəlib. "Halo" obrazının helikopterlə qaçırıldığı səhnədə pilotun adı Kaya İstektepe kimi təqdim olunur. Bu ad Kaya İstektepenin helikopter qəzasında həyatını itirən real pilotun adı ilə eynidir. Serialda isə həmin obraz daha sonra "Memati" tərəfindən öldürülür.

Baş Prokurorluq serialdakı bu detalların Kozinoğlunun ölümü ilə bağlı araşdırmaya hər hansı aidiyyəti olub-olmadığını müəyyənləşdirməyə çalışır.

Telegramda izləyin