Afra Saraçoğlu barəsində yayılan saxlanılma xəbərinə aydınlıq gətirdi

Türkiyədə məşhurlara qarşı aparılan narkotik istintaqı çərçivəsində haqqında saxlanılma qərarı verildiyi bildirilən aktrisa Afra Saraçoğlu barəsində yayılan xəbərlərə münasibət bildirib.

Sonxeber.az xarici mediaya istinadla xəbər verir ki, Bakırköy Respublika Baş Prokurorluğunun cəmiyyətin sağlamlığı və təhlükəsizliyini təhdid edən narkotik vasitələrlə mübarizə çərçivəsində apardığı istintaq zamanı aralarında aktyor, müğənni, iş adamı, sahibkar və sosial media fenomenlərinin də olduğu 18 nəfər barəsində saxlanılma qərarı çıxarılıb.

Şübhəlilərin narkotik vasitələrdən istifadə etdiyi, onların istifadəsini asanlaşdırdığı və ya bunun üçün yer təmin etdiyi iddiaları ilə əməliyyat keçirilib. Əməliyyatın ardından bəzi media orqanlarında Afra Saraçoğlunun da saxlanıldığı barədə məlumatlar yayılıb.

Aktrisa sosial media hesabında etdiyi paylaşımda bu xəbərləri təkzib edib. O, əvvəlcədən planlaşdırılan iş səfəri ilə əlaqədar hazırda xaricdə olduğunu bildirib.

Saraçoğlu ən qısa zamanda Türkiyəyə qayıdaraq istintaq çərçivəsində ifadə verəcəyini açıqlayıb.

"Ədalətin təcəlli etməsi və prosesin ən doğru şəkildə irəliləməsi üçün ən qısa zamanda ölkəmə qayıdaraq məhkəmə orqanlarımızla tam əməkdaşlıq şəraitində ifadəmi verəcəyəm. Ürəyim rahatdır, hər şeyin aydınlığa qovuşacağına tam inanıram", - deyə aktrisa bildirib.

Telegramda izləyin