Tramp 25 əsas nailiyyətini açıqladı: Siyahıda Bakı və İrəvan arasında sülh də var - Foto

Amerika Birləşmiş Ştatlarının Prezidenti Donald Tramp cari prezidentlik müddətində əldə etdiyini düşündüyü "25 əsas nailiyyət"in siyahısını ictimaiyyətə təqdim edib. O, əvvəllər də vurğuladığı kimi, "8 irimiqyaslı müharibənin nizamlanması" bəndinə Bakı ilə İrəvan arasında əlaqələrin normallaşdırılmasını da daxil edib.

Oxu.Az xəbər verir ki, ABŞ rəhbəri bu barədə "Truth Social" sosial şəbəkəsindəki hesabında paylaşım edib.

Diqqətçəkən məqam odur ki, Tramp siyahıya yazdığı şərhdə hazırkı müddəti üçüncü prezidentlik dönəmi adlandırıb. Xatırladaq ki, rəsmi olaraq Donald Tramp ABŞ-nin 45-ci və 47-ci prezidentidir, yəni bu vəzifəni ikinci dəfə icra edir. Lakin o, 2020-ci il seçkilərində Co Baydenə məğlubiyyətini hələ də qəbul etmir və bu məntiqə əsaslanaraq hazırkı mandatını üçüncü hesab edir. Qeyd etmək lazımdır ki, ABŞ Konstitusiyası (1951-ci ildə təsdiqlənmiş 22-ci düzəliş) bir şəxsin iki dəfədən artıq prezident seçilməsini qadağan edir - Tramp isə bu ifadəni daha çox siyasi gediş kimi işlədir.

"25 əsas nailiyyət"in siyahısına aşağıdakı bəndlər daxil edilib:

1. Ölkə tarixində ən etibarlı qorunan cənub sərhədini təmin edib - iddiaya görə, son 16 ay ərzində ABŞ-yə heç bir qeyri-qanuni miqrant buraxılmayıb.

2. Təhlükəli cinayətkarların - qanunsuz miqrantların ABŞ şəhərlərinin küçələrindən uzaqlaşdırılması üçün Leyken Rayli qanununu imzalayıb.

3. Qətl səviyyəsinin müşahidələr tarixində ən böyük düşüşünə - 1900-cü ildən bəri son 125 ilin ən aşağı göstəricisinə nail olub.

4. Yaşlı amerikalılar üçün bəxşiş, əlavə iş saatları və sosial təminat ödənişlərindən verginin ləğvi də daxil olmaqla, ABŞ tarixində ən böyük vergi endiriminə imza atıb.

5. ABŞ iqtisadiyyatına Çinin illik ÜDM-i ilə müqayisə oluna biləcək məbləğdə - 19.2 trilyon dollar həcmində yeni investisiyaların cəlbi üzrə öhdəlikləri təmin edib.

6. İstehsalatı ABŞ ərazisinə qaytarmaq məqsədilə tarixi tariflər tətbiq edib, o cümlədən idxal edilən mis, alüminium və polada 50%, idxal avtomobillərinə isə 25% rüsum qoyub.

7. Seçkilərdən sonra fond bazarı 80 dəfə yeni tarixi maksimumlar müəyyənləşdirib.

8. Hazırda ABŞ-də ölkə tarixinin istənilən dövründən daha çox insan işləyir.

9. ABŞ ordusuna tarixin ən böyük investisiyasını təmin edib - cari ildə 1 trilyon dollar və gələn il üçün nəzərdə tutulan 1,5 trilyon dollar.

10. Axtarışda olan Venesuela diktatoru Nikolas Maduronu ələ keçirərək məsuliyyətə cəlb edib.

11. Tehranın heç vaxt nüvə silahı əldə etməməsinə zəmanət vermək üçün İranın uran zənginləşdirmə potensialını məhv edib.

12. Narkokartellərə qarşı çoxsaylı uğurlu hərbi zərbələr endirib. Nəticədə ABŞ sərhədindən fentanil axını 60% azalıb.

13. 300%, 400%, 500% və 600% qiymət fərqlərini aradan qaldıraraq bir çox reseptli dərmanların dəyərini aşağı salmaq üçün ən əlverişli rejim müqavilələri imzalayıb.

14. "Yaşıl yeni yalan"a son qoyub, energetika sahəsində fövqəladə vəziyyət elan edərək "qaz, körpə, qaz" (Drill, Baby, Drill) prinsipini tətbiq etməyə başlayıb.

15. ABŞ avtomobil sənayesi üçün məhvedici hesab etdiyi elektromobil mandatını və digər "ağılsız" normaları ləğv edib.

16. Amerika ixracı tarixin ən yüksək səviyyəsinə qalxıb - bu il ölkə 2.3 trilyon dollarlıq mal ixracı göstəricisinə doğru irəliləyir.

17. Bütün federal hökumət və özəl sektorda Trampın fikrincə, ayrı-seçkilik xarakteri daşıyan "müxtəliflik, bərabərlik və inklüzivlik" (DEI) siyasətlərini ləğv edib.

18. Kişilərin qadın idman yarışlarında iştirakına qadağa qoyub.

19. Məktəblərdə transgenderlik ideologiyasını və kritik irq nəzəriyyəsini yasaqlayıb.

20. Hər bir yeni doğulan körpə üçün 8 000 dollardan başlayan, hər bir amerikalı uşaq üçün vergidən azad investisiya hesabları olan "Tramp hesabı"nı işə salıb.

21. İlk 12 ay ərzində tarixi sülh sazişləri bağlayaraq 8 müharibəni nizamlayıb, o cümlədən Qəzzadakı müharibəni bitirib. Azərbaycan və Ermənistan arasındakı münasibətlərin tənzimlənməsi də bu bəndə daxildir.

22. Bütün sağ əsirlərin öz ailələrinə qovuşmasına, eləcə də həlak olanların cəsədlərinin qaytarılmasına nail olub.

23. Somali və digər "təhlükəli" regionlar da daxil olmaqla, ABŞ-yə bütün qaçqınların qəbulunu dayandırıb.

24. Vaşinqton, Memfis və Yeni Orleanda qanunun və asayişin bərpası üçün Milli Qvardiyanı səfərbər edib.

25. İngilis dilini Birləşmiş Ştatların rəsmi dili elan edib.

Xatırladaq ki, 2025-ci il avqustun 8-də Vaşinqtonda Azərbaycan Prezidenti İlham Əliyev, onun amerikalı həmkarı Donald Tramp və Ermənistanın Baş naziri Nikol Paşinyanın iştirakı ilə keçirilən görüşün yekunlarına əsasən, Birgə Bəyannamə imzalanıb, həmçinin ikitərəfli sülh sazişinin mətni paraflanıb. Bununla da regionumuzda uzun illərdir davam edən münaqişəyə son qoyulub və sülh prosesi rəsmən yeni siyasi mərhələyə qədəm qoyub.

Telegramda izləyin