ABŞ Konqresində hərb naziri Pit Heqsetə qarşı narazılıq artır

ABŞ Konqresində ölkənin hərb naziri vəzifəsini icra edən Pit Heqsetin fəaliyyətinə qarşı narazılıq getdikcə güclənir.

Oxu.Az xəbər verir ki, bu barədə "The Wall Street Journal" (WSJ) qəzeti məlumat yayıb. Qeyd olunur ki, qanunvericilər ABŞ hərb nazirinin generalları istefaya göndərərək silahlı qüvvələri siyasiləşdirməsindən, həmçinin ABŞ-nin aydın çıxış strategiyası olmayan İrana qarşı müharibəni idarə etməsindən narahatdırlar. Qəzet xatırladır ki, bu həftənin əvvəlində Heqset Nümayəndələr Palatasının ona qarşı impiçment səsverməsi keçirməsinə çox yaxın olub. Nəşrin məlumatına görə, bu vəziyyətdən yalnız aşağı palatanın spikeri Mayk Consonun çərşənbə günü konqresmenləri noyabrın 3-də keçiriləcək aralıq seçkilərindən sonra bitəcək tətilə göndərmək qərarı sayəsində qaçmaq mümkün olub.

"80 general və admiralın istefaya göndərilməsi və ya vəzifədə yüksəlmək imkanından məhrum edilməsi məni çox narahat edir. Bunun impiçment üçün əsas olub-olmadığını bilmirəm. Axmaqlıq cinayət deyil", - deyə Nümayəndələr Palatasının üzvü Don Beykon qəzetə bildirib. Müdafiə nazirinin Konqres üzvləri ilə gərginləşən münasibətlərinin Pentaqonun maliyyələşməsinin artırılmasına mane ola biləcəyini Beykon və digər bir neçə qanunverici WSJ ilə söhbətlərində etiraf ediblər.

"The Wall Street Journal" Heqsetlə qanunvericilər arasında münasibətlərin pisləşməsinin daha bir sübutu kimi respublikaçıların rəhbərlik etdiyi Senatın Silahlı Qüvvələr üzrə Komitəsinin Heqsetin ictimaiyyətlə əlaqələr üzrə köməkçisi Şon Parnellin Quru Qoşunları naziri postuna namizədliyini dəstəkləməkdən inadla imtina etməsini göstərir. Bundan əlavə, qəzet əlavə edir ki, Heqsetin onlar üçün nadir hallarda brifinqlər keçirməsi də qanunvericiləri qane etmir.

Telegramda izləyin