Boşanmadan aliment almaq olar? - Çoxlarının bilmədiyi qayda

Ər-arvad boşanmasa belə, tərəflərdən biri uşağın saxlanılması üçün digər valideyndən aliment tələb edə bilər.

Milli.Az-ın məlumatına görə, Azərbaycan Respublikasının Ailə Məcəlləsinin 75-ci maddəsinə əsasən, valideynlər yetkinlik yaşına çatmayan uşaqlarını saxlamağa borcludurlar.

Valideynlər bu vəzifəni könüllü şəkildə yerinə yetirmədikdə uşağın saxlanılması üçün aliment məhkəmə qaydasında tələb oluna bilər.

Bunun üçün ilk növbədə alimentin müəyyən edilməsi ilə bağlı mediasiya təşkilatına müraciət olunmalıdır. Mediasiya xərci 60 manat təşkil edir.

Əgər mediasiya prosesində tərəflər arasında alimentin məbləği ilə bağlı razılıq əldə olunmazsa, iddia ərizəsi ilə məhkəməyə müraciət edilə bilər. Bu halda dövlət rüsumu ödənilmir.

Bir uşağa görə aliment, bir qayda olaraq, valideynin qazancının və digər gəlirlərinin dörddə biri, iki uşağa görə üçdə biri, üç və daha çox uşağa görə isə yarısı miqdarında tutulur. Gəlirin qeyri-müntəzəm olması və ya digər hallarda məhkəmə alimenti sabit pul məbləğində də müəyyən edə bilər.

Telegramda izləyin