Sosial şəbəkələrdə satılan bu dərmanlarla bağlı TƏHLÜKƏ - XƏBƏRDARLIQ

Son dövrlər sosial şəbəkələrdə arıqlama və çəki azaltma vədi ilə müxtəlif dərman və qida əlavələrinin satışı geniş yayılıb. Mənşəyi, tərkibi və təhlükəsizliyi barədə kifayət qədər məlumat olmayan belə məhsulların istifadəsi ciddi sağlamlıq riskləri yarada bilər. Xüsusilə məhsulun etiketində göstərilməyən maddələrin tərkibdə olması, yanlış dozalanma və həkim məsləhəti olmadan qəbul edilməsi narahatlıq doğuran məqamlardandır.

Bəs, sosial şəbəkələrdə satılan arıqlama dərmanları və qida əlavələrinin təhlükəsizliyini necə qiymətləndirmək olar, tərkibində gizli və sağlamlıq üçün təhlükəli maddələrin olması hansı risklər yaradır və insanlar belə məhsulları alarkən onların qeydiyyatı, tərkibi, mənşəyi və istifadəsi ilə bağlı hansı məqamlara diqqət etməlidirlər?
Mövzu ilə bağlı Sonxeber.az-a açıqlama verən farmakoloq Aydın Əliyev bildirib ki, o, birmənalı olaraq həkim məsləhəti olmadan dərman qəbulunun əleyhinədir.

"İstər artıq çəki, istərsə də digər xəstəliklər zamanı həkim məsləhəti olmadan heç bir dərman və ya qida əlavəsi qəbul etmək olmaz. Kütləvi informasiya vasitələrində, YouTube, TikTok və digər platformalarda dərman və qida əlavələri ilə bağlı müxtəlif reklamlar yayımlanır. Lakin hər hansı preparatı yalnız həkim məsləhətindən sonra qəbul etmək lazımdır. Məsələn, artıq çəkinin səbəbi düzgün qidalanmamaq, fiziki aktivliyin az olması və ya endokrin sistemlə bağlı problemlər ola bilər. Bu səbəblərin hər biri fərqli yanaşma və müalicə tələb edir. Həkim məsləhət gördüyü halda qida əlavələrindən də istifadə etmək mümkündür".

Farmakoloq bildirib ki, əks halda, bu preparatların qəbulu orqanların zədələnməsinə, mövcud patologiyanın ağırlaşmasına və allergik reaksiyalara səbəb ola bilər:

"Buna görə də həkim məsləhəti olmadan dərman və qida əlavəsi qəbul etməyi məsləhət görmürəm. Qida əlavəsi alarkən isə ilk növbədə həkim məsləhətinə diqqət etmək lazımdır. Həkim həmin vasitənin istifadəsini tövsiyə edibsə, məhsulun istehsalçısına və ən əsası istifadə müddətinə diqqət yetirilməlidir. Məhsulun istifadə müddətinin bitib-bitmədiyi mütləq yoxlanılmalıdır".

Röyalə Xəyal

Telegramda izləyin