Vahid məktəbli formasının əsas məqsədi səliqəli geyim mədəniyyətinin formalaşdırılmasıdır

"Vahid məktəbli formasının əsas məqsədi təhsil müəssisəsində vahid və səliqəli geyim mədəniyyətinin formalaşdırılmasıdır. Məktəb mühitində rahat, təhlükəsiz və təhsil prosesinə uyğun geyim mədəniyyəti yaradılmalıdır. Burada əsas prinsiplərdən biri də bərabərliyin təmin olunmasıdır. Sosial statusundan, ailəsinin maddi imkanlarından, etnik və ya dini mənşəyindən asılı olmayaraq, hər bir uşaq eyni şərtlərdə təhsil almalı və eyni imkanlara malik olmalıdır".

Bunu Sonxeber.az-a açıqlamasında Milli Məclisin deputatı Ceyhun Məmmədov bildirib.

Ekspert bildirib ki, Azərbaycanda təhsil sistemi dünyəvi xarakter daşıyır:

"Dünyəvi təhsil məktəbi bütün şagirdlər üçün neytral və inklüziv mühit olmalıdır. Vahid məktəbli forması şagirdlər arasında bərabərliyin və vahid məktəb mühitinin təmin olunmasına xidmət etməli, onlarda kollektivə aidlik, məsuliyyət və məktəbli kimliyi hissinin formalaşmasına müsbət təsir göstərməlidir. Uşaqların eyni mühitdə təhsil alarkən geyim baxımından bir-birindən fərqlənməməsi onların psixologiyasında da mühüm rol oynayır. Bu, şagirdlər arasında sosial-iqtisadi fərqlərin və ayrı-seçkilik risklərinin azalmasına imkan yarada bilər. Geyim qaydalarının müəyyən edilməsi məktəb-valideyn əməkdaşlığının güclənməsinə də töhfə verə bilər. Bu baxımdan vahid məktəbli geyimi təhsil prosesinin keyfiyyətinə də dəstək verən vasitə kimi qiymətləndirilə bilər".

Onun sözlərinə görə, təhsil müəssisələrində daxili nizam-intizam qaydalarına riayət bütün şagird və valideynlər üçün vacibdir:

"Burada məqsəd hansısa ayrı-seçkiliyə və ya fərqləndirməyə yol vermək deyil. Məktəbli geyimi məsələsi yalnız geyim mövzusu deyil, həm də təhsil fəlsəfəsi və sosial adaptasiya məsələsidir. Buna görə də bu yanaşma nəzərə alınmalıdır. Məktəbli forması tədris prosesinə və yaş xüsusiyyətlərinə uyğun, rahat və praktiki istifadə prinsipləri əsasında müəyyən edilir. Bir sözlə, vahid məktəbli formasının əsas məqsədi məktəbə aidlik hissini gücləndirmək, məktəbdə bərabər mühit yaratmaq və təhsil mühitinə uyğun ümumi prinsiplərin formalaşdırılmasına şərait yaratmaqdır. Təhsil müəssisəsində müəyyən edilmiş etik çərçivələrə uyğun olmayan geyimlərin istifadəsi yolverilməzdir və bu, təhsil mühitinə mənfi təsir göstərən məsələ kimi qiymətləndirilə bilər".

Röyalə Xəyal

Telegramda izləyin