Şagirdlərin məktəbə müəyyən edilmiş qaydalara uyğun geyimdə gəlməsi nəzərdə tutulur - AÇIQLAMA

"Geyimin məktəb mühitinə təsiri uzun müddətdir müzakirə olunan məsələlərdəndir. Vahid məktəbli formasına keçidlə bağlı təşəbbüslərdən biri də imkanlı ailələrin övladlarının bahalı və dəbdəbəli geyim və aksessuarlarla məktəbə gəlməsinin qarşısını almaq, şagirdlər arasında bu baxımdan fərqliliyi azaltmaq məqsədi daşıyırdı. Bu təşəbbüs bir neçə dəfə təkmilləşdirildikdən sonra 2022-ci ildə məktəblərin vahid formaya keçməsi ilə bağlı yekun qərar qəbul olundu".

Bunu Sonxeber.az-a açıqlamasında təhsil eksperti Məzahir Məmmədli bildirib.

O, bildirib ki, sonrakı illərdə də məktəblərdə geyim məsələsi ilə bağlı müzakirələr davam edib:

"Burada digər məsələlərlə yanaşı, şagirdlərin dini atributlarla, o cümlədən hicabla məktəbə gəlməsi və bunun digər şagirdlərə təsiri ilə bağlı valideynlərin narazılıqları da gündəmə gəldi. Bu məsələ son 3-4 il ərzində bir neçə dəfə Milli Məclisin Elm və təhsil komitəsində də müzakirə olunub. Nəhayət, bu müzakirələrin nəticəsi olaraq yekun variant hazırlanaraq Nazirlər Kabinetinə təqdim edildi. 21 sentyabr 2026-cı il tarixli 390 nömrəli qərarla məsələ nizamlandı. Bundan sonra valideynlərin də üzərinə öhdəlik düşür və hər bir valideyn öz övladının geyim formasına görə məsuliyyət daşıyır".

Onun sözlərinə görə, bu yanaşmanı dünyəvi təhsil modelinin tətbiqi baxımından da qiymətləndirmək olar:

"Məktəb mühitində geyimlə bağlı müəyyən məhdudiyyətlərin tətbiqi nəticəsində şagirdlərin məktəbə müəyyən edilmiş qaydalara uyğun geyimdə gəlməsi nəzərdə tutulur. Bu baxımdan gələcəkdə məktəblərdə qısa ətək, hicab, müxtəlif aksessuarlar, oğlanlarda təsbeh, qızlarda sırğa və üzük, eləcə də dırnaqların rənglənməsi kimi halların müşahidə olunmayacağı gözlənilir".

Röyalə Xəyal

Telegramda izləyin