Bəzi dövlətlərin metallurgiya və dağ-mədən sənayesi üzrə Azərbaycanla əməkdaşlığa üstünlük verməsi mümkündür

"Dağ-mədən sənayesini inkişaf etdirmək asan məsələ deyil, bu, çətin və mürəkkəb prosesdir. Xüsusilə son dövrlərin yeni texnologiyalarından istifadə etməklə bu sahənin inkişaf etdirilməsi vacibdir. Azərbaycan Prezidentinin müşavirədə dağ-mədən və metallurgiya sənayesinin inkişafı ilə bağlı səsləndirdiyi fikirləri bir neçə istiqamətdə dəyərləndirmək olar".

Bunu Sonxeber.az-a açıqlamasında politoloq Samir Hümbətov bildirib.

O, bildirib ki, bu gün dünyada, xüsusilə nadir metalların və digər yeraltı təbii sərvətlərin, o cümlədən dəmir və digər bərk elementlərin araşdırılması istiqamətində ciddi addımlar atılır:

"Bu, təkcə litiuma deyil, eyni zamanda qızıl və digər əlvan metallara da aiddir. Düşünürəm ki, böyük ehtimalla Azərbaycan dövləti bu istiqamətdə konkret araşdırmalar aparıb və bu sahədə böyük iqtisadi potensialın olması ilə bağlı müəyyən fikirlər var. Görünür, Azərbaycan Prezidentinin də bu proqramın inkişaf etdirilməsi ilə bağlı konkret yanaşması mövcuddur. Burada əsas məqsədlərdən biri gələcəkdə neftdən asılılığın azaldılması və qeyri-neft sektorunun inkişafına diqqətin artırılmasıdır. Neft hasilatı da təbii olaraq müəyyən müddətdən sonra azalacaq və dünyada bu resursun tükənməsi qaçılmazdır. Buna görə də digər sahələrdə səmərəli işlər görülməlidir ki, bu, gələcəkdə iqtisadi potensialın qorunub saxlanılmasına xidmət etsin".

Politoloq bildirib ki, eyni zamanda, bəzi dövlətlərin metallurgiya və dağ-mədən sənayesinə ehtiyacı olduğuna görə iqtisadi münasibətlərə yenidən baxmaları və Azərbaycanla əməkdaşlığa üstünlük vermələri mümkündür:

"Xüsusilə xarici şirkətlərin Azərbaycanda fəaliyyəti ilə bağlı məsələlərin də bu proqramda yer alacağını düşünürəm. Bütün bunlar Azərbaycan dövlətinin iqtisadi potensialına müsbət təsir edən amillər kimi dəyərləndirilə bilər. Təbii ki, bunun üçün qarşıya qoyulan tapşırıqlar və proqram düzgün, vaxtında və səmərəli şəkildə həyata keçirilməlidir. Bu halda əldə olunan nəticələr gələcəkdə dövlətin digər sahələrdəki iqtisadi potensialına da fayda verə bilər".

Röyalə Xəyal

Telegramda izləyin