Pakistan-Əfqanıstan müharibəsində gərginlik artır - POLİTOLOQDAN AÇIQLAMA

Əfqanıstan və Pakistan arasında aylar ərzində davam edən gərginlik yenidən silahlı qarşıdurma mərhələsinə keçib. Pakistanın Əfqanıstan ərazisinə hava zərbələri endirməsi, sərhəddə qarşılıqlı atəşə tutulma və tərəflərin bir-birini silahlı qruplaşmalara dəstək verməkdə ittiham etməsi bölgədə vəziyyəti daha da gərginləşdirib. İslamabad Taliban hakimiyyətini Pakistan ərazisində hücumlar həyata keçirən TTP (Pakistan Talibanı) döyüşçülərinə sığınacaq verməkdə ittiham edir.

Kabul isə bu ittihamları rədd edir və Pakistanın Əfqanıstana zərbələrini ölkənin suverenliyinə qarşı təcavüz kimi qiymətləndirir. Bəs Əfqanıstan və Pakistan arasında münaqişə niyə yenidən alovlanıb? Qarşıdurma genişmiqyaslı müharibəyə çevrilə bilərmi və bu proses region üçün hansı riskləri yaradır?

Mövzu ilə bağlı politoloq Rəsul Tağıyev Sonxeber.az-a açıqlamasında bildirdi ki, Pakistanla Əfqanıstan arasında baş verənlər artıq adi sərhəd insidentləri çərçivəsindən çıxaraq iki dövlət arasında daha ciddi hərbi qarşıdurmaya çevrilmək riski daşıyır. Onun sözlərinə görə, son günlər Pakistanın Əfqanıstan ərazisinə hava zərbələri endirməsi və Taliban hakimiyyətinin buna qarşı sərt reaksiyası gərginliyin səngimədiyini göstərir: "Oktyabrın 1-dəki zərbələrdən sonra BMT Əfqanıstanda azı 10 mülki şəxsin öldüyünü açıqlayıb, Pakistan isə əməliyyatların silahlı qruplaşmaların mövqelərinə qarşı həyata keçirildiyini bildirib. Əsas problem Pakistanın Təhrik-i-Taliban Pakistanın (TTP) Əfqanıstan ərazisindən fəaliyyət göstərməsi ilə bağlı ittihamlarıdır. Taliban isə bu ittihamları qəbul etmir. Bu qarşılıqlı ittihamlar və sərhəddə baş verən hücumlar tərəflər arasında etimadı faktiki olaraq aradan qaldırıb. Hazırda vəziyyəti daha da mürəkkəbləşdirən məqam odur ki, diplomatik kanallar tamamilə bağlanmayıb. Oktyabrın 5-də Moskvada Əfqanıstan məsələsi ilə bağlı keçirilən görüşdə Pakistan və Taliban nümayəndələri də iştirak ediblər. Rusiya isə tərəflər arasında vasitəçilik etməyə hazır olduğunu bildirib. Mən hesab edirəm ki, qarşıdurmanın genişmiqyaslı müharibəyə çevrilməsinin qarşısını almaq üçün əsas yol hərbi əməliyyatların deyil, diplomatik mexanizmlərin işə salınmasıdır.

Əks halda sərhəddə hər yeni zərbə qarşı tərəfin cavab reaksiyasına səbəb ola və vəziyyəti nəzarətdən çıxara bilər. Bu proses təkcə Pakistan və Əfqanıstana deyil, bütövlükdə Cənubi və Mərkəzi Asiyanın təhlükəsizlik mühitinə təsir göstərə bilər".

Müəllif: İlkin Məmmədkərimov

Telegramda izləyin