"Kənd yumurtası"ndan embrion çıxdı: Nə etmək lazımdır? - Ekspertdən AÇIQLAMA

Mağazalarda "kənd yumurtası" adı ilə satılan məhsulların keyfiyyəti və təhlükəsizliyi istehlakçılar üçün mühüm məsələlərdəndir. Yumurtanın içindən embrion çıxması onun mayalanmış olması ilə bağlı ola bilər, lakin məhsulun saxlanma şəraiti və temperatur rejimi də bu prosesə təsir göstərə bilər. Belə halla qarşılaşan istehlakçının məhsulun təhlükəsizliyi ilə bağlı hansı addımları atmalı olduğu da diqqət çəkən məsələlərdəndir.

Bəs, mağazadan "kənd yumurtası" adı ilə alınan yumurtanın içindən embrion çıxması hansı hallarda baş verə bilər, belə yumurtanın istehlak edilməsi insan sağlamlığı üçün risk yaradırmı və istehlakçı bu vəziyyətlə qarşılaşdıqda hansı addımları atmalıdır?
Mövzu ilə bağlı Sonxeber.az-a açıqlama verən qida eksperti Fərid Səfərov bildirib ki, "kənd yumurtası" adı ilə satılan yumurtanın içindən embrionun çıxması ilk növbədə həmin yumurtanın mayalanmış olduğunu göstərir:

"Əgər yumurta xoruzla təmasda olan toyuqdan əldə olunubsa, mayalanma təbii şəkildə baş verə bilər. Bu isə öz-özlüyündə yumurtanın xarab və ya təhlükəli olması demək deyil. Burada əsas məsələ saxlanma şəraitidir. Mayalanmış yumurta uyğun temperaturda, xüsusilə isti şəraitdə saxlanıldıqda embrionun inkişafı başlaya bilər. Soyuq şəraitdə saxlanma isə bu prosesi əhəmiyyətli dərəcədə ləngidir və ya dayandırır. Mağazada satılan yumurtalarda belə halın olması məhsulun hansı şəraitdə əldə edildiyi, daşındığı və saxlandığı barədə də suallar yarada bilər".

Ekspert bildirib ki, embrionun olması avtomatik olaraq insan sağlamlığı üçün zəhərlənmə riski demək deyil:

"Əsas risk yumurtanın mikrobioloji təhlükəsizliyi ilə bağlıdır. Xüsusilə yumurta uzun müddət isti şəraitdə qalıbsa, bakteriyaların, o cümlədən Salmonella kimi patogenlərin çoxalması mümkündür. Embrion inkişaf etmiş, yumurtanın qoxusu, rəngi və görünüşü dəyişmişsə, belə məhsulun istehlak edilməməsi daha doğru yanaşmadır. Yaxşı bişirmək mikrobioloji riski azalda bilər, lakin şübhəli və düzgün saxlanılmamış məhsulu istehlak etmək tövsiyə olunmur. İstehlakçı belə vəziyyətlə qarşılaşdıqda yumurtanı istehlak etməməli, qablaşdırmanı və məhsulun etiket məlumatlarını saxlamalı, mümkün olduqda foto və video çəkməlidir. Məhsulun alındığı mağazaya müraciət edərək məsələni bildirmək və məhsulun digər yumurtalarının da yoxlanılmasını tələb etmək olar. Əgər məhsulun təhlükəsizlik və ya etiketlənməsi ilə bağlı şübhə varsa, aidiyyəti qida təhlükəsizliyi qurumlarına məlumat vermək məqsədəuyğundur. Ən vacibi isə "kənd yumurtası" ifadəsini avtomatik olaraq daha təmiz, daha təhlükəsiz və ya nəzarətsiz məhsul kimi qəbul etməməkdir. İstehlakçı üçün əsas meyar yumurtanın mənşəyinin, saxlanma və daşınma şəraitinin, satış qaydalarının və qida təhlükəsizliyi tələblərinə uyğunluğunun təmin edilməsidir".

Röyalə Xəyal

Telegramda izləyin