ABŞ-İran müharibəsində gərginlik artır: Hörmüz boğazında tankerə hücum

ABŞ və İran arasında davam edən hərbi qarşıdurmada gərginlik yenidən yüksəlib.

Sonxeber.az Reuters-ə istinadən xəbər verir ki, son hadisələr əsasən Hörmüz boğazında baş verən hücumlar, ABŞ-ın hərbi hazırlığı və Tehranla Vaşinqton arasında nüvə proqramı ilə bağlı fikir ayrılıqları ətrafında cərəyan edir.

Hörmüz boğazından keçən "On Peace" tankerinə hücum edilib. Hindistan Xarici İşlər Nazirliyinin məlumatına görə, hadisə nəticəsində 12 ekipaj üzvü yaralanıb. Onlardan 11-nin Hindistan vətəndaşı olduğu bildirilib. Yaralıların təxliyəsində Oman iştirak edib.

Bununla yanaşı, ABŞ İranın mümkün pilotsuz uçuş aparatı hücumu ilə bağlı təhlükəsizlik narahatlıqları fonunda Böyük Britaniyadakı RAF Fairford bazasından 12 B-1 bombardmançı təyyarəsini ABŞ-a geri çəkib.

Vaşinqton və Tehran arasında əsas fikir ayrılıqlarından biri isə İranın nüvə proqramıdır. ABŞ rəsmiləri Tehranın uranın zənginləşdirilməsi fəaliyyətini əhəmiyyətli dərəcədə azaltmasını tələb edir. İran isə ABŞ-ın tələbləri ilə bağlı fərqli mövqe nümayiş etdirir.

Hörmüz boğazında yaranan vəziyyət enerji bazarlarına da təsir göstərir. Dünyanın ən mühüm neft marşrutlarından biri hesab olunan bu boğazda təhlükəsizliklə bağlı narahatlıqlar neft tədarükünün gələcəyi ilə bağlı riskləri artırıb.

Hazırda əsas sual qarşıdurmanın daha da genişlənib-genişlənməyəcəyi və tərəflərin diplomatik razılaşmaya gedib-getməyəcəyidir. ABŞ-İran qarşıdurmasının uzanması isə yalnız region üçün deyil, qlobal enerji bazarı və beynəlxalq ticarət üçün də ciddi nəticələr yarada bilər.

Müəllif: İlkin Məmmədkərimov

Telegramda izləyin