Pul köçürmələrinə görə komissiya tutulacaq: Vətəndaşları apreldən nə gözləyir? - İQTİSADÇIDAN AÇIQLAMA

Ölkədə 2027-ci il aprelin 1-dən kartdan-karta pul köçürmələri üzrə yeni xidmət haqları tətbiq ediləcək. Azərbaycan Mərkəzi Bankının təsdiqlədiyi yeni tariflərə əsasən, köçürülən məbləğdən asılı olaraq xidmət haqqı 3 qəpikdən 4 manatadək dəyişəcək.

Bəs yeni tariflər vətəndaşların gündəlik pul köçürmələrinə necə təsir edəcək? Bu dəyişiklik bank müştəriləri üçün hansı nəticələr doğuracaq və komissiyaların tətbiqi nə dərəcədə əsaslıdır?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, Mərkəzi Bankın açıqlamasına görə, söhbət 2027-ci il aprelin 1-dən qüvvəyə minəcək yeni tariflərdən gedir. Əsas məqam budur ki, bu məbləğlər vətəndaşlardan birbaşa tutulacaq komissiyalar deyil. Bunlar Banklararası Kart Mərkəzində emal olunan əməliyyatlara görə bankların və digər iştirakçıların ödəyəcəyi xidmət haqlarıdır. Bankların müştərilər üçün tətbiq etdiyi tariflər ayrıca müəyyən edilir.
Kartdan-karta köçürmələr üzrə yeni xidmət haqları belədir:

| Köçürmə məbləği | Xidmət haqqı |
| ---------------------- | ------------ |
| 100 manatadək | 3 qəpik |
| 100,01-1 000 manat | 10 qəpik |
| 1 000,01-10 000 manat | 50 qəpik |
| 10 000,01-40 000 manat | 2 manat |
| 40 000 manatdan yuxarı | 4 manat |

Bu tariflər banklararası ödəniş infrastrukturuna aiddir. Buna görə vətəndaşların aprelin 1-dən bütün kartdan-karta köçürmələr üçün mütləq bu məbləğləri ödəyəcəyi qənaətinə gəlmək düzgün deyil.

Mərkəzi Bankın yeni tarif siyasəti AZIPS və XÖHKS sistemlərində xidmət haqlarının yuxarı hədlərinin azaldılmasını, Ani Ödənişlər Sistemində isə daha aşağı tariflərin tətbiqini də nəzərdə tutur. Məqsəd ödəniş infrastrukturunun səmərəliliyini artırmaq və xidmət haqlarını optimallaşdırmaqdır.

Müəllif: İlkin Məmmədkərimov

Telegramda izləyin