ABŞ-İran müharibəsi ilə bağlı son vəziyyət: Vaşinqton yeni zərbə variantlarını nəzərdən keçirir

ABŞ ilə İran arasında hərbi qarşıdurma və diplomatik təmaslar beynəlxalq gündəmin əsas mövzularından biri olaraq qalır. Vaşinqtonun mümkün hərbi əməliyyatlarla bağlı variantları nəzərdən keçirməsi, Hörmüz boğazında gəmiçilik təhlükəsizliyi və Tehranla danışıqların taleyi regiondakı vəziyyətə təsir edən əsas məsələlər sırasındadır.

ABŞ İrana qarşı yeni hərbi zərbə variantlarını nəzərdən keçirir

ABŞ administrasiyasının İrana qarşı mümkün yeni hərbi əməliyyatlarla bağlı hazırladığı variantlar arasında MOAB kimi tanınan güclü qeyri-nüvə bombasının tətbiqi də yer alır. Bu barədə ABC News oktyabrın 15-də məlumat yayıb.

Məlumata görə, ABŞ prezidenti Donald Tramp hələlik yekun qərar verməyib. Ağ Ev rəsmisi isə İranın nüvə silahına sahib olmasının qarşısını almaq üçün bütün variantların nəzərdən keçirildiyini bildirib.

Hörmüz boğazında gərginlik artır

Reuters-in oktyabrın 14-də yaydığı məlumata görə, İran Hörmüz boğazında gəmilərə qarşı hücum taktikasını dəyişib və bölgədə gəmiçilik üçün təhlükə artıb. Bu marşrut dünya enerji ticarəti baxımından mühüm əhəmiyyət daşıyır.

Boğaz ətrafındakı təhlükəsizlik vəziyyəti neft daşımalarına və beynəlxalq bazarlara da təsir göstərir.

ABŞ və İran arasında danışıqlar dalana dirənib

Sonxeber.az Reuters-ə istinadən xəbər verir ki, İran Xarici İşlər Nazirliyinin sözçüsü İsmayıl Bəqayi oktyabrın 12-də bildirib ki, Tehran Hörmüz boğazının açılması ilə bağlı təklifinə ABŞ-ın cavabını nəzərdən keçirir. İran tərəfi cavabını vasitəçilər vasitəsilə çatdıracağını açıqlayıb.

Tərəflər arasında əsas fikir ayrılıqlarından biri danışıqların ardıcıllığıdır. Vaşinqton İranın nüvə proqramının müzakirələrdə ön sırada olmasını istəyir, Tehran isə ilk növbədə Hörmüz boğazında təhlükəsizliyin təmin edilməsinə üstünlük verir.

Müəllif: İlkin Məmmədkərimov

Telegramda izləyin