Melaniya Tramp Aleşkidə ABŞ jurnalistlərinin müşahidəçi kimi iştirakını təsdiqləyib

ABŞ-ın birinci xanımı Melaniya Tramp Rusiya və Ukrayna tərəflərinin iştirakı ilə Xerson vilayətinin Aleşki şəhərində keçiriləcək humanitar missiyanı ABŞ jurnalistlərinin müşahidə edəcəyini təsdiqləyib.
Bizimyol.info xəbər verir ki, Melaniya Tramp bu barədə "X" sosial şəbəkəsində Rusiya Prezidentinin beynəlxalq investisiya və iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiyalar Fondunun rəhbəri Kirill Dmitriyevin paylaşımına münasibət bildirərkən yazıb.

Onun sözlərinə görə, "Newsmax" telekanalının dörd əməkdaşı Rusiya və Ukrayna tərəflərindən olan humanitar missiya nümayəndələrini müşayiət edəcək. Jurnalistlər neytral müşahidəçilər kimi hadisələri müstəqil şəkildə lentə alacaq və humanitar əməliyyatın gedişini sənədləşdirəcəklər.

Məlumata əsasən, humanitar əməliyyata hazırlıqla əlaqədar Rusiya Silahlı Qüvvələri oktyabrın 27-də Moskva vaxtı ilə saat 04:00-dan etibarən Xerson istiqamətində atəşkəs rejimi tətbiq edib.

Bundan əvvəl Melaniya Trampın vasitəçiliyi ilə Rusiya və Ukrayna Aleşkidə humanitar yardımın çatdırılmasını və mülki əhalinin xüsusi təhlükəsiz dəhliz vasitəsilə təxliyəsinə hazırlıq görülməsini təmin etmək üçün atəşkəs barədə razılığa gəliblər.

Rusiya prezidentinin mətbuat katibi Dmitri Peskov sentyabrın 21-də Aleşkidə humanitar vəziyyətin kritik olduğunu bildirmişdi. Rusiya tərəfinin iddiasına görə, atəşlər və Ukrayna qüvvələrinin pilotsuz uçuş aparatlarının hücumları səbəbindən şəhərə ərzaq və dərman çatdırmaq mümkün deyil.

Məlumatda bildirilir ki, əvvəllər şəhərdə yaşayan 20 min nəfərdən hazırda mindən bir qədər çoxu Aleşkidə qalır.

Telegramda izləyin