Pentaqonun məxfi sənədləri mediaya SIZDI: ABŞ Ukraynanı şəhər savaşına hazırlayıb

Rusiyanın Ukraynaya hücumlarının 11-ci günüdür. İndi Ukraynanın hər yerində dağıntı var. Dünən ABŞ mətbuatında dərc olunan xəbərdə müharibəyə hazırlıqların çox əvvəldən başladığı üzə çıxıb.

Avropa.info xəbər verir ki, "Washington Post"un əldə etdiyi məlumatlara görə, ABŞ administrasiyası Ukraynanı şəhər müharibələrinə hazırlayıb. Xəbərə səbəb kimi qəzetin əldə etdiyi məxfi sənədlər göstərilib. Sözügedən sənəddə ABŞ Müdafiə Nazirliyi olan Pentaqonun uzun müddətdir Kiyev administrasiyasına göndərdiyi hərbi texnikanın siyahısı yer alıb.

Məlumata görə, Pentaqon son bir ildə Ukraynanı bir sıra texnika və patrul katerləri ilə təmin edib. Lakin siyahıda ən diqqət çəkən detallar ötən dekabr ayından bəri göndərilən silahlar olub. Rusiya prezidenti Vladimir Putin fevralın 24-də hücum əmrini verib. ABŞ-ın dekabr ayından bu yana göndərdiyi hərbi yardımlar arasında zenit raketləri və çoxlu sayda piyada silahları da var.

"Vaşinqton Post" qəzetində çıxan xəbərin başlığında "Müharibə yaxınlaşdıqca ABŞ Ukraynanı Rusiya təyyarələrini və tanklarını vurmaq üçün silahlandırdı və şəhər toqquşmalarına hazırlaşdı" deyilir. Xəbərdə Ağ Ev rəhbərliyinin Ukraynaya ilk dəfə "Stinger" hava hücumundan müdafiə sistemləri ilə birlikdə "Javelin" raketləri göndərdiyi bildirilib. Qəzetə danışan rəsmilər ABŞ-ın müharibənin küçə toqquşmalarına çevriləcəyini proqnozlaşdıraraq belə bir addım atdığını bildirib. ABŞ-ın yüksək səviyyəli müdafiə rəsmisi bildirib ki, keçən il Birləşmiş Ştatlar Ukraynaya 1 milyard dollardan çox hərbi yardım ayırıb.

Qeyd edək ki, Ukrayna şəhərləri Rusiya ordusuna müqavimət göstərməkdə davam edir. Rus ordusu Xarkov şəhərini darmadağın edib. Ukraynanın paytaxtı Kiyevdə addım-addım yaxınlaşan rus ordusuna qarşı böyük hazırlıq başlayıb. Demək olar ki, hər küçədə barrikadalar qurulub.

Hətta Azadlıq meydanının ətrafına dəmir, beton baryerlər çəkilib. Şəhərdə bir çox ictimai binalar qum torbaları ilə möhkəmləndirilib. Əsas küçələrdə barrikadalar qurulub. Zirehli texnikanın keçməsinin qarşısını almaq üçün yollara şlaqbaumlar və minalar düzülüb. "Molotov kokteyli" barrikadaların arxasında qalıb.

66 224 ukraynalı Rusiyaya qarşı döyüşmək üçün öz ölkələrinə qayıdıb. Kiyevdəki səfirliklər də bağlanıb. Paytaxtdakı 77 səfirlikdən 70-i bağlanıb. Türkiyə də daxil olmaqla cəmi 7 səfirlik açıq qaldı. Açıq qalan səfirliklər də təxliyə planı hazırlayıblar. Kiyevdə qarşıdurmaların güclənməsi ilə bağlı qalan səfirliklər də ölkədə qalan bir neçə vətəndaşla birlikdə Kiyevi tərk edəcək.

Ukrayna mətbuatında yer alan bir iddia dünya gündəminə düşüb. Mətbuatda çıxan xəbərlərdə Rusiya-Ukrayna müharibəsində atəşkəs ümidi çərçivəsində aparılan danışıqlarda iştirak edən Denis Kireev adlı nümayəndə heyətinin üzvü Ukrayna Gizli Xidməti tərəfindən öldürüldüyü iddia edilib. Vətənə xəyanət ittihamı ilə nəzarətə götürüldüyü deyilən Kireevin bu müddət ərzində öldürüldüyü iddia edilir.

Ukrayna Baş Qərargahı müharibədə öldürülən rus əsgərlərinin sayının 10 mini keçdiyini açıqlayıb. Açıqlamada 39 təyyarə, 40 helikopter, 269 tank, 945 zirehli texnika, 105 artilleriya sistemi, 409 avtomobil, 60 yanacaq çəni və 3 pilotsuz uçuş aparatının zərərsizləşdirildiyi qeyd edilib. Rusiya Müdafiə Nazirliyi Ukraynada 2 min 37 hərbi infrastruktur obyektinin məhv edildiyini açıqlayıb.

Birləşmiş Millətlər Təşkilatı Ukraynada ölən və yaralananların sayının 1000-i keçdiyini bəyan edib. Ölkəni tərk edənlərin sayının 1 milyon 300 mini keçdiyi qeyd edilib.

Telegramda izləyin