"Ermənistan bizim ərazi bütövlüyümüzü sülh sazişi çərçivəsində rəsmən tanısa, bütün mənzərə köklü şəkildə dəyişəcək"

Bildiyimiz kimi, Ermənistan XİN-in yaydığı məlumatlarda Azərbaycanın guya ermənilərin kütləvi qətlində iştirak etdiyi barədə itithamlar yağdırılır. Daha sonra isə bu ölkə regionda sülhün tərəfdarı olduğunu bildirir. Bu ikili açıqlamalara səbəb nədir?

Məsələ ilə bağlı Sonxeber.az-a Beynəlxalq Münasibətlərin Təhlili Mərkəzinin sədri Fərid Şəfiyev açıqlama verib.

O bunların ayrı-ayrı məsələlər olduğunu vurğulayaraq, Ermənistanla sülh sazişinə nələrin daxil olacağının dəqiq bilinmədiyini deyir:

"Biz Ermənistana qarşı müvafiq beynəlxalq məhkəmələrdə iddia qaldırmışıq, onlar da bizə qarşı iddia qaldırıblar. Ermənilərin əsas məqsədi "Qarabağ statusu" məsələsini gündəmdə saxlamaqdır. Onlar Qarabağ üçün ən azından avtonomiya istəyirlər, bu ərazini Azərbaycandan ayırmaq isə ən ali arzularıdır. İnanmıram ki, Paşinyan və havadarları bu məqsədlərindən əl çəksinlər.

Amma bu o demək deyil ki, biz onlarla sülh sazişini imzalamamalıyıq. Çünki Ermənistan bizim ərazi bütövlüyümüzü sülh sazişi çərçivəsində rəsmən tanısa, bütün mənzərə köklü şəkildə dəyişəcək.

Sülh prosesi özü də böyük bir prosesdir və uzun illər çəkə bilər.

Biz sazişi imzalaya bilərik, lakin orada delimitasiya-demarkasiya məsələləri var. Neçə illərdir ki, Gürcüstanla bu prosesi davam etdiririk.
Təbii ki, yaxın bir ildə sülh sazişi imzalamağımız yaxşı olardı, amma humanitar və digər məsələlər uzun illər çəkəcək".

ZAİRA AKİFQIZI

Telegramda izləyin