"Dedilər, üzü "Moşu"dur, rədd eləyin, getsin..."- Valeh Kərimov

"Məcburam ki, oturum ölümümü gözləyim".

Sonxeber.az-ın məlumatına görə, bu sözləri Azərbaycanın xalq artisti Valeh Kərimov "Üzə düz" verilişində deyib.

Aktyor bildirib ki, onu yalnızca "Bəxt üzüyü" filminə çəkiblər:

"İndiyə kimi mənə "Moşu", "xalq" deyirdilər. Mənim adımı yeni-yeni tanıyırlar. O, xalqın içindən çıxmış obrazdır, xalq adamıdır. Sadəcə bir az demaqoqluğu var, istedadsız insandır. İstedadı yoxdur, amma şair olmaq istəyir, qafiyə qoşur, ortalığa isə bir şey çıxmır.

O rol mənə çox mane oldu. Hamını filmə çəkirlər, məndən başqa. Təkcə filmim elə "Bəxt üzüyü"dür. Bir-iki dəfə məni kinostudiyaya dəvət ediblər. Gördüm pıçıldayırlar ki, sifəti "Moşu"dur, nə rol oynasa da, alınmaz. Rədd eləyin, getsin. Bu məni çox incidib. Axı başqa obraz üçün məni qrim də etmək olardı, saqqal, bığla görünüşümü dəyişmək də olardı.

Evdə oturub ölümümü gözləyirəm. Söhbət küskünlükdən getmir. Bekar insanam. Mənim də bekarçılıqdan zəhləm gedir. Mən bu sənətə gəlmişəm ki, ömürlük işləyim. Axı niyə kənarda qalım ki? Canım sağ, danışığım yerində, gözlərim görür, qulağım da eşidir. Mən yaratmaq istəyirəm.

Maaş vermə, prezident təqaüdü alıram, amma çalışım. Axı vaxtı ilə səhnədən ötəri atam da məni danışdırmayıb. Səhnəyə hər şeyimizi qurban vermişik, səhnədən ötəri gec ailə qurdum. Müəllimim dedi ki, "ailəlisən"? Dedim, subay. Dedi, "özünü sənətdə tapsan, evlənərsən". Gördüm, tapmadım, gedib evləndim. İkisindən birini seçdim. Evdə öz-özümə nə qədər monoloq qurum?.."

Aysel SƏFƏRZADƏ

Telegramda izləyin