"Ermənilər yaxşı anlayırlar ki, Azərbaycan vətəndaşlığını qəbul etmək onların qurtuluşudur" - DEPUTAT

"Laçının, Zabuxun və Sus kəndinin boşalması ilə Laçın dəhlizi yenidən Azərbaycanın nəzarətinə keçəcək".

Bu sözləri Sonxeber.az-a danışan deputat Cavanşir Paşazadə deyib.

Deputat bildirib ki, Laçın, Sus və Zabux kəndləri Suriya və Livandan gələn ermənilərin məskunlaşması nəticəsində ikinci dəfə işğala məruz qalmışdı:

"Erməni xisləti hər zaman özünü büruzə verib. Bilirsiniz ki, 2020-ci ildə danışıqlar zamanı ermənilər Kəlbəcər və Laçından çıxmaları üçün vaxt istəyiblər. Həmin vaxt ərzində onlar Kəlbəcərdə meşələri, evləri yandırıb, əraziləri minalayıb getdilər. Bu gün ermənilər Kəlbəcərdə törətdikləri vəhşilikləri Zabux və Sus kəndlərində təkrarlamaqdadırlar. Bunlar erməni vəhşiliyidir. Onlar bu vandallığa görə məsuliyyət daşıyırlar. Azərbaycan Laçın rayonunu, o cümlədən Zabux kəndini yenidən bərpa edəcək və həmin torpaqların sahibləri öz ata-baba yurdlarına qayıdacaqlar.

10 noyabr bəyanatına əsasən, Rusiya sülhməramlıları və ermənilər bundan sonra Laçın şəhərindən və ətraf kəndlərdən çıxmalıdırlar. Bu proses, demək olar ki, yekunlaşmaq üzrədir. bir neçə gündən sonra Azərbaycanın üçrəngli bayrağı Laçın şəhərində dalğalanacaq".

Deputat qeyd edib ki, Laçın dəhlizinə alternativ yolun çəkilməsi istiqamətində Azərbaycan üzərinə düşən bütün addımları atıb:

"Azərbaycan 32 km uzunluğunda olan yolu öz ərazisində tamamlayıb. Amma Ermənistan bununla bağlı üzərinə düşən öhdəliyi yerinə yetirməyib. Ən önəmlisi isə odur ki, Ermənistan Qarabağda yaşayan ermənilərin taleyi ilə maraqlanmır. Məhz buna görə də Qarabağda yaşayan ermənilər yaxşı anlayırlar ki, Azərbaycan vətəndaşlığını qəbul etmək onların qurtuluşudur".

C. Paşazadə vurğulayıb ki, Ermənistan Azərbaycana qarşı soyqırımının bütün növlərini törədib:

"Laçın şəhəri, Zabux və Sus kəndlərinin tamamilə boşaldılması prosesi avqust ayının sonuna kimi yekunlaşacaq. Bundan əvvəl də, 2020-ci ilin dekabrında olduğu kimi, ermənilər tərk etdikləri ərazilərdə apara bilmədikləri nə varsa, hamısını yandırmağa, məhv etməyə, dağıtmağa başlayıblar. Ermənistan insanlıq əleyhinə cinayətlər törətməklə, beynəlxalq konvensiyaları kobud şəkildə pozmaqla, regional və qlobal təhlükəsizliyə ciddi təhlükə törədən dövlət olduğunu nümayiş etdiriri.

Ermənilər Laçındakı meşələri yandırır, abidələrimizi məhv edirlər. Onlar yerin altını da minalarla çirkləndirilər və bu, insanlığa qarşı törədilən cinayətdir. Təəssüf ki, 30 ilə yaxın müddətdə torpaqlarımızın işğal altında qalmasına göz yuman, demokratiyadan dəm vuran beynəlxalq təşkilatlar və dövlətlər ermənilərin törətdikləri ekoloji terrorlara, vəhşiliklərə səssiz qalırlar. Bu da bir daha ölkəmizə qarşı yürüdülən ikili siyasətin bariz nümunəsidir.

Artıq Ermənistan və havadarları mövcud reallıqla barışmalı, Azərbaycanın diktə edən tərəf olduğunu qəbul etməlidir. Azəbaycan 90-cı illərdə olduğu kimi gücsüz və başsız deyil! Bu gün 30 illik işğala öz gücünə son qoyan Ali Baş Komandana və Müzəffər Orduya sahibdir!"

Aysel Yusifqızı

Telegramda izləyin