"Tütək səsi"nin məşhur aktyorları 47 ildən sonra yenidən bir arada

Azərbaycan tamaşaçılarının uzun illərdir yorulmadan baxdığı "Tütək səsi" filminin əsas aktyorları 47 ildən sonra yenidən bir araya gəliblər.

"Tütək səsi"ndə Milli obrazını canlandırmış aktrisa Xalidə Quliyeva və Tapdıq rolunun ifaçısı Akif Məhərrəmov Azərbaycan Respublikası Kinematoqrafçılar İttifaqında görüşüblər.

"Bu gün Azərbaycan Respublikası Kinematoqrafçılar İttifaqında dostlarla səmimi görüş oldu. Azərbaycan kinosunu dirçəldib daha da inkişaf etdirmək, respublika kinematoqrafiyasının şöhrətini qaytarmaq, milli kinomuza töhfələr vermək niyyəti ilə çalışan dəyərli həmkarlarla, istedadlı yaradıcı insanlarla, kinoda xidməti olan peşəkar sənət ustaları ilə hər görüş ömrün xoş xatirələrini yada salır. Və sonra belə səmimi görüşün özü də xatirələrə çevrilib ömrümüzdə qalır...", - deyə Akif Məhərrəmov görüş haqda deyib.

Xatırladaq ki, yazıçı-publisist, Əməkdar jurnalist Akif Məhərrəmov (Akif Əli) uzun müddət (1994-2019) Nazirlər Kabinetinin mətbuat xidmətinin rəhbəri işləyib. O, "Tütək səsi"indən əlavə daha üç filmə çəkilib.

Xalq artisti Xalidə Quliyeva isə ümumilikdə 30-a yaxın filmdə rol alıb.

Qeyd edək ki, yazıçı İsa Hüseynovun "Saz" və "Tütək səsi" əsərləri əsasında ekranlaşdırılmış "Tütək səsi" filmi 1975-ci ildə çəkilib, 1976-cı ildə isə premyerası olub.

Kinopovestdəki hadisələr II Dünya Müharibəsi illərində Azərbaycan kəndlərinin birində gərgin zəhmət, ümumxalq birliyi, eyni zamanda mürəkkəb insan münasibətləri mühitində cərəyan edir. Bu kənddə hər bir evdə müharibənin nəfəsi duyulur. Qadınlar və uşaqlar cəbhəyə getmiş ərlərin, ataların, oğulların yerinə çöl işlərini görürlər. Filmdə həyat da var, məhəbbət də. Sarsıntı da var, sevinc də...

Quruluşçu rejissoru Rasim Ocaqov olan filmdə əsas rollarda Akif Məhərrəmov (Tapdıq), Ötkəm İsgəndərov (Nuru), Mixail Volontir (Cəbrayıl), Yusif Vəliyev (Qılınc Qurban), Məmmədrza Şeyxzamanov (İsfəndiyar kişi), Liya Eliava (Sayalı), Xalidə Quliyeva (Milli) Sadıq Hüseynov (Rza), Səfurə İbrahimova (İsmət) və başqaları çəkilib.

Filmin çəkilişləri əsasən Bakıda - kinostudiyanın pavilyonunda, təbiət səhnələri isə Qusar rayonunun kəndlərində aparılıb./Modern

Telegramda izləyin

instagramda izləyin