Qarın yağmasının hansı faydaları var?

Artıq bir neçə gündür ki, Bakı sakinləri uzun müddət sonra yenidən qar sevincini yaşayırlar. Sonuncu dəfə belə güclü qar burada 2012-ci ildə müşahidə olunub. Qar sevənlər, yaşından asılı olmadan, evdə otura bilməyib özlərini küçəyə atırlar. Lakin diqqətli olmaq lazımdır ki. bu sevinc xəstəliklə bitməsin.

Bəs görəsən, hər yeri ağ örpəyə bürüyən qarın yağmasının insanlara nə kimi faydası var?

BiG.AZ-ın bu sualını həkim-fitoterapevt, apiterapevt, bitkilər üzrə elmi işçi Elnur Eldaroğlu cavablandırıb.

Soyuq havanın müsbət cəhətlərindən danışan həkim soyuqdəymədən qorunmaq üçün təbii üsullardan yararlanmağı da məsləhət görüb:

"Qış xəstəliklərinə səbəb olan mikroorqanizmlər soyuq havalarda yaşamlarını davam etdirə bilmirlər. Digər tərəfdən də qar yağarkən çirkli havanın təmiz bir havaya dönməsinə şərait yaradır.

Biz adətən hər zaman soyuq hava görmürük.

Davamlı iş, ev və məktəb mühitlərində isti və qapalı şəraitdə oluruq. Beləliklə, soyuq havada yaşaya bilməyən mikroorqanizmlərin çoxalması və yoluxdurması üçün əlverişli bir vəziyyət ortaya çıxır. Ona görə də, təəssüf ki, qar yağarkən mikrobların ölməsinin havaya çıxmayan, daim qapalı mühitdə qalan insana faydası olmur.

Maraqlıdır ki, qar insanların ruh halına da müsbət təsir göstərdiyinə görə immunitetin artmasına təsir edir.

Bunlara baxmayaraq, soyuqlamadan qorunmaq üçün tədbir görməyə yenə də ehtiyac var. Fərdi gigiyenaya diqqət etmək, olduğumuz mühiti havalandırmaq və otağın istiliyini çox da yüksəltməmək lazımır. Hər kəslə öpüşüb-görüşmək vərdişini azaltmaq da məsləhətdir.

6-8 saat yuxu rejimini pozmamaq, mövsümə uyğun meyvə və tərəvəzlərlə qidalanmaq, həmçinin bitki çayları və alma sirkəsindən istifadə etmək tövsiyə olunur".

Dr. Eldaroğlu bu havalarda təbii immunitet artıran məcun hazırlamağı məsləhət görüb.

RESEPT:

Çörəkotu toxumu tozu 100 q
Buğda cücərtisi 100 q
Çiçək tozu 100 q
Zəncəfil 10 q
Hil 3 ədəd
Bal 600 q

Gündə 2-3 dəfə yemək və cökə çayı içmək məsləhətdir.

Telegramda izləyin