Misirdə dünyanın ən bahalı və böyük muzeyi açılır

Misirdə yeni müasir Böyük Misir Muzeyi kompleksi (GEM) inşa edilir.

BiG.AZ atorus.ru-ya istinadən xəbər verir ki, muzey kompleksinin inşasına 1 milyard dollar ayrılıb.

Bu, hazırda dünyanın ən bahalı muzeyidir. Yeni muzey Böyük piramidaların yaxınlığında yerləşir. Turistləri cəlb etmək üçün muzeyin yaxınlığında Sfinks hava limanı tikilib. Bu muzey 300 min kvadrat metr ərazini əhatə edəcək və dünyanın ən iri muzeylərindən biri olacaq.

Muzeyə nəhəng sərgi salonları daxil edilir. Bunların əsasını qalereyalar təşkil edəcək - burada Tutanhamonun məzarından demək olar ki, bütün əşyaları nümayiş olunacaq.

Ziyarətçilər ilk dəfə olaraq bir məkanda əfsanəvi xəzinədən 5000 artefakt, o cümlədən fironun məşhur qızıl maskası, qızıl arabalar, sarkofaqlar, qızıl çarpayılar və döyüş arabaları, qiymətli daşlarla bəzədilmiş sədəf zinət əşyaları ilə tanış ola biləcəklər.

Həmçinin, firon Hufuya məxsus, ruhları axirətə aparan məşhur günəş gəmisi bu muzeydə sərgilənəcək. Onun uzunluğu 42 metr, yaşı 4600 ildir və dünyanın indiyədək qalan ən böyük qədim taxta gəmisidir.

Muzeyə giriş yerli əhali üçün 60 Misir funtu, yerli tələbələr üçün 30 funt olacaq. Xarici turistlər üçün Böyük Misir Muzeyinə biletin qiyməti 200 funt, əcnəbi tələbələr üçün 100 funt təşkil edəcək.

Muzeyin açılışının nə vaxt olacağı barədə hələlik rəsmi məlumat verilməyib. Bundan əvvəl ölkənin Turizm Nazirliyi açılışın 2023-cü ildə olacağını açıqlamışdı.

Telegramda izləyin