İran İsfahandakı hərbi obyektə hücumu Israilin təşkil etdiyini deyir

İran İsrailin İsfahan şəhərindəki hərbi obyektə pilotsuz təyyarələrlə hücuma görə məsuliyyət daşıdığını bildirib.

Sonxeber.az xəbər verir ki, İran Tələbələr Xəbər Agentliyinin (İSNA) məlumatına görə, İranın BMT-dəki daimi nümayəndəsi Səid İrəvani BMT-nin baş katibi Antonio Quterreşə məktub yazıb.

İrəvani məktubunda qeyd edib ki, yanvarın 28-də İsfahan şəhərində hərbi obyektə hücumla bağlı aparılan ilkin araşdırmalar hücumun arxasında İsrailin olduğunu göstərib.

"İran öz milli təhlükəsizliyini müdafiə etmək və sionist rejimin hər hansı təhdid və cəhdinə lazım bildiyi vaxt qəti şəkildə cavab vermək kimi qanuni və təbii haqqını özündə saxlayır" ,- deyə İrəvani bildirib.

İranın dövlət televiziyası yanvarın 28-nə keçən gecə İranın İsfahan şəhərində Müdafiə Nazirliyinin sursat istehsal edən müəssisəsində güclü partlayış baş verdiyini açıqlayıb.

İran Müdafiə Nazirliyi də İsfahandakı hərbi obyektin mikro pilotsuz uçuş aparatları ilə hücuma məruz qaldığını bildirib.

Wall Street Journal 29 yanvar tarixli xəbərində adı açıqlanmayan Amerika rəsmilərinə və hadisədən xəbəri olan insanlara istinadən hücumu İsrailin etdiyini yazıb.

İranın Ali Milli Təhlükəsizlik Şurasına yaxınlığı ilə tanınan "Nournews" xəbər saytı İsfahandakı hücumda istifadə edilən təyyarənin İraqın şimalındakı separatçı kürd qrupları tərəfindən xarici bir ölkənin rəhbərliyi ilə ölkəyə gətirildiyini açıqlayıb.

Şəbnəm Lətifi

Telegramda izləyin