"Daşla bədənimi kəsdim" - Tapdığı mişarla dağıntılar altından çıxan şəxs yaşadıqlarını DANIŞDI - VİDEO

Türkiyədəki dəhşətli zəlzələdən sonra Hatayda dağıntılar altından möcüzəylə sağ çıxan iş adamı Adnan Fırat Albayram yaşadığı dəhşətli anlar barədə danışıb.

BiG.AZ türk mətbuatına istinadən xəbər verir ki, zəlzələ zamanı qaldığı otelin otağından qaçan Albayram uçan nərdivanların boşluğuna düşüb.

Nərdivanların dəmir tutacaqlarının arasında ilişən ayağının üstünə daşlar düşdüyündən Fırat yerindən tərpənə bilməyib. O, yanında divara ilişib qalan mişar tapıb. Bir saat çalışdıqdan sonra həmin mişarı divardan çıxarıb və iki saat ərzində çətinliklə dəmirləri kəsərək ayağını daşların altından çıxarıb.

Daha sonra o, sürünərək qaldığı otağa qayıdıb, pəncərədən səslənərək 3 nəfəri köməyə çağırıb və onların yardımıyla binadan tullanıb. Ayağından ağır zədə alsa da, xilas olunan Albayram xəstəxanaya yerləşdirilib.

O, yaşadıqlarını yoldaşına göstərmək üçün, vəziyyətinin çox da ağır olmadığını, çıxmağa çalışdığını ona bildirmək üçün mobil telefonla çəkiliş edib.

Dağınılar altında qalarkən qaçıb gedənlərin birinin telefonunda azan səsi eşidilib. Həmin an Albayram "kəlmeyi-şəhadətini" dediyini, qurtulmaq üçün dua etdiyini və sağ qalacağına inandığını etiraf edib.

Soyuqda isinmək üçün o, haradansa eşitdiyi bir məlumatı tətbiq edib: əlinin altındakı daşlarla bədənini kəsib və bundan sonra bədən hərarəti qalxıb.

Albayram yaşadıqlarından sonra psixoloji travma keçirdiyini və hətta qonşuluqda kimsə gəzdikdə, səslər gəldikdə qorxu keçirdiyini bildirib.

Telegramda izləyin