Gürcüstanın Baş naziri:"Torpaqlarımızın 20 faizi hələ də Rusiyanın işğalı altındadır"

Gürcüstanın Baş naziri İrakli Qaribaşvili Gürcüstan ərazisinin 20 faizinin hələ də Rusiyanın işğalı altında olduğunu bildirib.

Sonxeber.az xəbər verir ki, Qaribaşvili Birləşmiş Millətlər Təşkilatının (BMT) Nyu-Yorkda keçirilən 78-ci Baş Assambleyasının müzakirələrində iştirakçılara müraciət edib.

Çıxışının əvvəlində Qaribaşvili ölkəsinin yaşadığı ərazi bütövlüyü problemlərinə toxunub və izah edib ki, bu çətinliklərə baxmayaraq, Gürcüstanın inkişafı üçün səmərəli fəaliyyətlərini davam etdirirlər.

Qaribaşvili beynəlxalq tərəfdaşları qoşunlarını Gürcüstandan çıxarmaq və Cenevrə danışıqlarına qayıtmaq üçün Rusiyaya təzyiq göstərməyə çağırıb.

O, qondarma Abxaziya və Cənubi Osetiyada yaşayan xalqları birlik və həmrəyliyə çağırıb.

"Mən abxaz və osetin qardaşlarımıza müraciət edirəm. Bizim ümumi düşmənimiz bizim birliyimizə qarşıdır. Biz inanılmaz nailiyyətlər əldə etməyə qadir olan parlaq insanlarıq, birlikdə uzunmüddətli sabitliyi təmin edə, böyük sərmayələri cəlb edə və vahid xalq olaraq bütün potensialımızı reallaşdıra bilərik" ,- deyə Baş nazir qeyd edib.

Qaribaşvili vurğulayıb ki, yaşadıqları ərazi bütövlüyü problemlərinə baxmayaraq, Gürcüstan iqtisadiyyatı son illər kifayət qədər səmərəli şəkildə inkişaf etməkdə davam edib.

Çıxışında Ukrayna-Rusiya müharibəsinin davam etdiyini xatırladan Qaribaşvili Ukraynaya dəstəyini bildirib.

"Ukraynanın hazırda yaşadığı problemləri tam şəkildə hiss edirik və Ukrayna xalqı ilə tam həmrəy olduğumuzu bildiririk" ,- deyə o əlavə edib.

Qaribaşvili Ermənistan-Azərbaycan münasibətlərinə də toxunub:

"Biz bəyan edirik ki, Cənubi Qafqazda nəhayət daimi sülhün bərqərar olması üçün Ermənistan və Azərbaycandan olan qonşularımızı və dostlarımızı bu prosesə cəlb etməyə hazırıq".

Gürcüstanın baş naziri İrakli Qaribaşvili çıxışında ölkəsinin Avropa İttifaqına (Aİ) üzvlüyünün Gürcüstan hökuməti üçün geosiyasi prioritet olduğunu bəyan edib.

Aİ ilə inteqrasiya prosesini səmərəli şəkildə davam etdirdiklərini deyən Qaribaşvili hökumət olaraq bu istiqamətdə lazımi islahatları həyata keçirdiklərini bildirib.

Ötən il Aİ-yə namizəd ölkə statusu üçün onlara 12 meyar təqdim edildiyini xatırladan Qaribaşvili ilin sonuna kimi bütün meyarlara cavab verə biləcəklərini bildirib.

O, Gürcüstanda əhalinin təxminən 90 faizinin ölkənin Aİ-yə inteqrasiyasını dəstəklədiyini qeyd edib.

Qaribaşvili ilin sonunda Aİ-dən namizəd ölkə statusu alacaqlarını gözlədiklərini bildirib.

Şəbnəm Lətifi

Telegramda izləyin

instagramda izləyin