Uşaqlar qorxulu personajlara niyə MARAQ GÖSTƏRİR?- AÇIQLAMA

Məktəbəqədər yaşda uşaqların şəxsiyyətinin formalaşmağa başladığı, rol bacarıqlarının özünü göstərdiyi dövrlərdə baxılan bəzi cizgi filmlər, kompüter oyunları uşaqlarda qəzəb, aqressiya kimi emosiyaların yaranmasına səbəb olur. Uşaqları ailələri ilə vaxt keçirməli olduqları bir vaxtda cizgi filmlərinə yönləndirmək onların baxdıqları personajları təqlid etmələrinə səbəb olur. Bu baxımdan azyaşlılar qorxulu personajlara niyə maraq göstərir?

Mövzu ilə bağlı psixoloq Fərqanə Mehmanqızı Sonxeber.az-a açıqlama verib:

"Uşaqların oyunlara olan marağı normaldır. Çünki istər kompüter oyunlarında, istərsə də oyuncaqlarda oynayan zaman uşaqlar özlərini tapırlar. Belə olan halda onlar öz fantaziyalarını ortaya qoyurlar. Bu çox normal haldır. Qorxulu personajlara maraq isə hər uşaqda olmur. Bunun əsas səbəbi qorxulu personajların bizə güclü qəhrəman kimi göstərmələri ilə bağlıdır. Onlardan hamının qorxması ilə əlaqədardır. Bu personajlar hər dövrdə olub. Buna nümünə olaraq küpəgirən qarı, başında torba olan bir kişi və s. Bu personajlar güclü olduğu üçün hər kəs ondan qorxur.

Psixoloqun sözlərinə görə, bu personajlar uşaqların şüuraltında bir anlayış formalaşdırır. Onlar düşünür ki, həmin personajlar qorxulu və güclüdür:

"Ona görə gücə və qorxuya qarşı uşaqlarda maraq yaranır. Xarakterdən asılı olaraq, qorxunun üzərinə gedən uşaqlarda var. Uşaqlarda qorxunu aşmaq maraqları da olur. Qorxular qapalı olduğuna görə, onları açmağa çalışır. Buna görə də onlara qarşı uşaqlarda diqqət var. Çizgi film qəhrəmanlarında və personajlar arasında qorxulu olanlar daha rəngli və qabarıq olur. Bu da istər-istəməz uşaqların diqqətini çəkir".

Texnologiyanın sürətli inkişafı və aktiv istifadəsi ilə televizor, kompüter və planşet kimi məhsullar həyatımızın vacib hissəsinə çevrilib. Son zamanlar şiddəti əks etdirən cizgi filmlərin, kompüter oyunlarının sayının artması uşaqlara son dərəcə mənfi təsir göstərir.

Sevda Səfərova

Telegramda izləyin