"Ərdoğanın Şuşaya növbəti səfəri Qarabağla bağlı ermənilərə havadarlıq etmək istəyənlər üçün bir mesaj ola bilər" - DEPUTAT

"İşğaldan azad olunduqdan sonra Şuşaya ilk səfər edən xarici dövlət başçısı qardaş Türkiyə dövlətinin prezidenti Rəcəb Tayyib Ərdoğan olmuşdu".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Rəcəb Tayyib Ərdoğan iyulda Şuşada keçiriləcəyi gözlənilən Türk Dövlətləri Təşkilatına üzv ölkələrin dövlət başçılarının qeyri-rəsmi sammitinə qatılacaq

"Rəcəb Tayyib Ərdoğanın Şuşaya səfəri iki dövlət arasındakı dostluq, qardaşlıq münasibətlərinin inkişafı baxımından önəmlidir. Onun növbəti dəfə Azərbaycanın Mədəniyyət paytaxtı olan Şuşaya səfəri dostlarımızı sevindirəcək, düşmənlərimizə gözdağı olacaq. Rəcəb Tayyib Ərdoğanın Şuşaya səfər etməsi Qarabağla bağlı ermənilərə havadarlıq etmək istəyənlər üçün də bir mesaj ola bilər. Azərbaycan-Türkiyə münasibətləri "bir millət, iki dövlət" fəlsəfəsinə əsaslanır. Bizim dilimiz, dinimiz və mədəniyyətimiz demək olar ki, birdir. Bu gün Türkiyə dünyanın böyük dövlətlərindən biri olması bizim üçün qürurvericidir. Türkiyə dövlət başçısının hər Şuşaya səfəri böyük rəmzi məna daşıyır".

Deputat vurğulayıb ki, Rəcəb Tayyib Ərdoğanın Şuşaya ikinci səfəri çox əlamətdar olacaq, vacib müzakirələr aparılacaq:

"Azərbaycanın Mədəniyyət paytaxtı Şuşanın azad olunması bütün türk dünyasının zəfəridir. İki qardaş dövlət başçıların səfərləri Azərbaycan-Türkiyə qardaşlığını, dostluğunu möhkəmləndirir və hər bir sahədəki əməkdaşlığı daha da inkişaf etdirir. Azərbaycan xalqı Türkiyə Prezidentinin Şuşaya ikinci səfərini böyük çoşğu ilə qarşılayacaq".

Telegramda izləyin