"Ərdoğanın Şuşaya növbəti səfəri Azərbaycan-Türkiyə arasındakı münasibətləri daha da yüksək səviyyəyə çatdıracaq" - DEPUTAT

"Rəcəb Tayyib Ərdoğanın Şuşaya növbəti səfəri dostluq və qardaşlığımızın növbəti təntənəsidir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, iyulda Şuşada Türk Dövlətləri Təşkilatına üzv ölkələrin dövlət başçılarının qeyri-rəsmi sammiti keçiriləcək:

"Həmin samitdə Rəcəb Tayyib Ərdoğan da iştirak edəcək. Bilirsiniz ki, Rəcəb Tayyib Ərdoğan Şuşaya səfər edən ilk xarici ölkə rəhbəridir. Bu gün Türkiyə dünyada haqqı və ədaləti müdafiə edən güclü dövlətdir. 44 günlük Vətən müharibəsi zamanı və sonrakı dövrdə Türkiyə hər zaman Azərbaycanı dəstəkləyib. Rəcəb Tayyib Ərdoğan ilk səfəri zamanı Şuşada olan mədəniyyət mərkəzlərinin, tarixi abidələrin yerlə-yeksan olmasını öz gözləri ilə gördü və bütün dünyaya bəyan etdi. "Zəfər paradı"nda da iki qardaş ölkə başçılarının möhtəşəm qələbəni birlikdə qeyd etməsi Türkiyə-Azərbaycan dostluğunu sarsılmaz və əbədi olduğunu sübut etdi. Ərdoğanın növbəti Şuşa səfəri siyasi və mənəvi əhəmiyyəti var".

Deputat vurğulayıb ki, bütün dövrlərdə Azərbaycan-Türkiyə münasibətləri yüksək səviyyədə olub:

"Bu gün Türkiyə şirkətləri işğaldan azad edilmiş ərazilərdəki bərpa işlərində yaxından iştirak edirlər. Türkiyə hər zaman Azərbaycanın yanındadır. Həmçinin Azərbaycan qardaş ölkə kimi Türkiyənin yanındadır. Rəcəb Tayyib Ərdoğanın Şuşaya səfərinin böyük əhəmiyyət kəsb. Düşünürəm ki, Rəcəb Tayyib Ərdoğanın Şuşaya növbəti səfəri Azərbaycan və Türkiyə arasındakı münasibətləri daha yüksək səviyyəyə çatdırılmasına xidmət edəcək".

Telegramda izləyin