Azərbaycanda niqab taxmaq qadağan OLUNA BİLƏR

Xəbər verdiyimiz kimi, Dağıstan Müftiliyi bölgədə niqab taxmağa müvəqqəti qadağa tətbiq edib. Bu barədə respublika müftisinin müavini Əbdül Səlimov məlumat verib. O, həmçinin arvadının görünməməsini istəyən ərlərə "onları evdə saxlayın" deyə tövsiyə verib. Qeyd olunub ki, qadağa müəyyən edilmiş təhdidlər aradan qaldırılana qədər qüvvədə olacaq.

Son zamanlar dünya ölkələrində törədilər terror aktları ilə əlaqədar artıq bu geyimə qadağalar tətbiq edilir. Azərbaycanda da bu geyimlə dolaşan xanımlara rast gəlmək mümkündür. Təhlükəsizliyin təmin edilməsi məqsədilə Azərbaycanda qadınların niqab taxmağına qadağa qoyula bilər?

Mövzu ilə bağlı Sonxeber.az-a danışan sosioloq Lalə Mehralı deyib ki, niqabda olarkən şəxs tanınmır, dolayısı ilə o niqabın altında kim var, qaranlıq qalır:

"Dünya təcrübəsində də belə vəziyyətlərdə terror hallarının törədilməsi ehtimalları var, ona görə də tədbir görülməsi normaldır. Niqab taxan hər kəs terrorçu deyil, amma terrorçu kamuflaj olmaq üçün niqab geyinir və bu təsdiqini tapıb. Ona görə də qadağan edilirsə, ictimai təhlükəsizlik üçün edilir və etiraz edilməməlidir. Bu həmçinin niqab geyinənlərin təhlükəsizliyi üçündür. Eyni zamanda ailələrinin. əzizlərinin güvəndə olması üçün əhəmiyyətli addımdır. Etiraz etmək, rədd etmək doğru deyil. Zənnimcə bizdə də o cür terror hadisələri olsa qadağan edilə bilər, tədbir üçün bu normaldır. Bu konkret niqab geyinməyə qadağa qoymaq kimi qiymətləndirilməməlidir. Niqab altında terrorçunun ola bilmə ehtimalına qarşı tədbir görmək kimi dəyərləndirmək lazımdır".

Qeyd edək ki, niqab yalnız gözlərin göründüyü qadın üst geyimidir. Bu yaxınlarda Tacikistanda da bu geyim qadağan edilib.

Sevda Səfərova

Telegramda izləyin

instagramda izləyin