"Güclü ssenari, rejissor yoxdursa, aktyor yazıq təkbaşına nə etsin?" - xalq artisti Rasim Balayev

"Kinoda sözsüz rolları oynamağa da bəzən ehtiyac olur. Ola bilsin ki, bəzən heç mətn lazım deyil. O içinin güzgüsü olan gözlə oynamalıdır. Ən maraqlı səhnələr də sözsüz səhnələrdir. Aktyorun istedadı da orada üzə çıxır. Sən düşünə-düşünə ekranın qarşısında oturan tamaşaçını da düşündürürsən. Tamaşaçı da düşünür ki, görəsən həmin aktyor indi nə deyəcək?! Bəzən söz artıq olur"

Bunu Moderator.az -a açıqlamasında xalq artisti, Azərbaycan Kinematoqrafçılar İttifaqının sədri Rasim Balayev deyib. O daha sonra əlavə edib.

""Nəsimi" filmində bir kəlmə də artıq söz, epizod yoxdur. Biz çəkiliş meydançasına gələndə gözləmirdik, hər şey hazır idi. Bircə nizamları, kompozisiyanı qururdular. Mən sonralar da filmlərdə çəkildim. Bir də görürdün ki, bir xətt çəkirdilər, deyirdilər bu xəttdən o yana getmə, foksdan çıxarsan. Mən də qalırdım belə ki, çəkilən xətti fikirləşim, yoxsa obrazın sözlərini? Rəhmətlik operatorumuz Rasim İsmayılov deyirdi ki, bu meydan sənindir, necə oynayırsansa-oyna, mən sənin kadrını tutacağam. Şərait yaradırdı ki, sərbəst olaq, öz oyunumuzu oynayaq. Fikirləşməyim ki, kamera buradadır, mən kadrdan çıxdım. Bu da böyük şərtdir. Operator işi, musiqi, rejissor işi bir-birini tamamlayanda orada gözəl iş ortaya çıxır. "Nəsimi" filmində bir dekorasiya yoxdur. Hər biri tarixi məkanlarda çəkilib" deyə sənətkar bildirib.
Rasim Balayev deyir ki, hazırda ssenarilər zəifdir.

"Mən bu gün sənətə gəlsəydim işləməzdim. Aktyor var, təbii ki, istedadlıları da var. Onları dramaturgiya ilə, ssenari ilə, rejissura ilə ortaya çıxaran yoxdur. Aktyor yazıq tək nə etsin? Onun nə mətni yox, nə rejissoru var! Mən tək axı nə edə bilərəm?" deyə sənətkar bildirib.

Telegramda izləyin