Ermənilər oğurladıqları mahnılarımıza görə təzminat VERMƏLİDİR: Sülh müqaviləsində isə mədəni problemlər YER ALSIN - TƏKLİF

Xəbər verdiyimiz kimi, Azərbaycan bəstəkarı Bəhram Nəsibovun "Qarabağ" ("Anadır arzulara hər zaman Qarabağ") adlı musiqi əsəri erməni ifaçı Gor Yepremyan tərəfindən "Sirun jan" adı altında mənimsənilərək ifa edilib və "Youtube"da yayılıb. Ermənilərin bizim mahnılarımızı oğurlaması halları ilk deyil. Amma hələ də onlar bizim mədəni sərvətlərimizi talan etməkdən əl çəkə bilmirlər.

Bəs mənimsənilən mahnılarımız ilə bağlı hansı addımlar atılmalıdır? Məsələ ilə bağlı Sonxeber.az-a danışan Azərbaycan bəstəkarı, Azərbaycan Respublikasının xalq artisti Sərdar Fərəcov bildirib ki, bununla əlaqədar Azərbaycanda hazırda Müəllim Hüquqları Agentliyi adlı yeni bir cəmiyyət yaradılıb:

"Orada bəstəkar Gövhər Həsənzadə rəhbərlik edir. Bəstəkar Gövhər Həsənzadə bununla əlaqədar aktiv fəaliyyət göstərir. Ermənilərin oğurladığı mahnımız çox məşhurdur. Artıq onun yaşı sərhədləri keçir. Bunu oğurlayaraq oxuyan erməni yeni ifaçıdır. Bu mahnı 70-ci illərdə dəfələrlə Qarabağ ermənilər tərəfindən oğurlanıb. O cümlədən Ermənistanda yaşayan ermənilərdə bu mahnını özlərinin olaraq təqdim edib. Çünki Azərbaycan musiqisi çox gözəldir və melodiyası zəngindir. Ermənilərdə belə şey yoxdur. Buna görə də ermənilər ancaq oğurlamağa məhkumdur. Onlar zamanında Üzeyir Hacıbəyov, Fikrət Əmirov və Seyid Rüstəmovun bəstələrini oğurlayıblar. Ona görə saymaqla bitirmək olmaz. Ermənilərdə nəsil dəyişdikcə oğurluq işi daha səmərəli inkişaf edir. Onlar həmişə Azərbaycanın maddi sərvətləri ilə qidalanıblar. Mənəvi sərvətlərimizi isə oğurlamaqda davam edirlər. Ona görə də biz buna öyrəşmişik".

Bəstəkarın sözlərinə görə, mahnılarımızın oğurlanmasına görə həbs cəzası olmasa da, təzminat ala bilərik. Amma iki ölkə arasında bununla əlaqədar müqavilələr bağlanmalıdır:

"Müqavilə bağlananda onlar hansısa bəstəkarın musiqisini ifa etmək istəyəndə Azərbaycanın Müəlliflər Hüququ İdarəsinə məlumat verməlidirlər. Mahnı əgər konsertdə ifa edilibsə, müəyyən faiz köçürülməlidir. Ortada normal münasibət olmalıdır. Erməni sözü ilə normal münasibət anlayışı düzgün gəlmir. Ona görə qarşıda böyük sülh müqaviləsi gözləyirik. Sülh müqaviləsində mədəniyyət sahəsində bəzi maddələr öz əksini tapmalıdır. Mütləq nəzərə alınmalıdır ki, 100 ildən çoxdur ermənilər Azərbaycan musiqisini talan edir. Qəribəsi odur ki, biz erməni oxumuruq və heç lazım da deyil. Onlar mahnılarımızı təkcə öz dillərində deyil, həm də Azərbaycan dilində ifa edirlər. Belə olan təqdirdə qanunda bu məsələ öz əksini tapmalıdır. Hələ ki, yoxdur. Ona görə də bizə ancaq belə narazı etmək və gileylənmək qalır. Amma qanun şəklində qüvvəyə minəndə və ermənilər təzminat ödəyəndə ağılları başlarına gələcək".

Sevda Səfərova

Telegramda izləyin