"Mehdi Sübhani verdiyi sərsəm açıqlamalarla Ermənistan cəmiyyətinin rəğbətini qazanmaq istəyir" - DEPUTAT

"İranın Ermənistandakı səfiri Mehdi Sübhaninin sonuncu müsahibəsi ölkəmizə qarşı növbəti təxribatdir".

Bunu Sonxeber.az-a açıqlamasında deputat Cavanşir Paşazadə bildirib.

Deputat qeyd edib ki, səfir səsləndirdiyi fikirlərlə Ermənistanın və regionda vəziyyəti yenidən gərginləşdirməyə çalışan qüvvələrin maraqlarına xidmət etdiyini bir daha sübut etdi:

Xüsusilə də İranda azərbaycanəsilli Məsud Pezeşkianın prezident seçilməsi və Tehrandakı səfirliyimizin bərpa olunduğu ərəfədə onun belə mövqe sərgiləmısi bir sıra suallar yaradır. Əsasən də Azərbaycan-İran münasibətlərinin yenidən normallaşdığı ərəfədə onun belə fikirlər səsləndirməsi düşündürücüdür. Hesab edirəm ki, İran hökuməti səfirin bu təxribatı ilə bağlı ölçü götürməlidir".

Deputat vurğulayıb ki, səfirin müsahibəsində obyektivlikdən uzaq fikirlər səsləndirməsi onun ölkəmizə qarşı qərəzli olmasından xəbər verir:

"Mehdi Sübhani artıq başa düşür ki, yeni hakimiyyət onun əleyhinə qərar verə bilər. Ona görə də Mehdi Sübhani bu cür sərsəm açıqlamalarla Ermənistan cəmiyyətinin rəğbətini qazanmağa çalışır. Ermənistan da bunu bildiyi üçün səfirdən ölkəmiz əleyhinə istifadə edir. Ümid edirəm ki, Mehdi Sübhani Azərbaycanın ünvanına səsləndirdiyi əsassız fikirlərə görə İran hökuməti tərəfindən cəzalandırılacaq".

Telegramda izləyin