Bu ailələrə məktəbli formaları PULSUZ VERİLƏ BİLƏR? - AÇIQLAMA

Yeni tədris ili ərəfəsində məktəbli formaları və məktəb ləvazimatları hər zaman gündəm mövzulardan biri olub. Dərs ilinin başlanmasına bir aydan az vaxt qalıb. Belə olan təqdirdə məktəbli formaları və ləvazimatları mağazalarında alıcı sıxlığını müşahidə etmək mümkündür. Məktəb formalarının qiymətlərində ucuzlaşma olsa da, məktəbli ləvazimatları üçün bunu deyə bilmərik. Ötən il ilə müqayisədə dərsliklərdə və digər ləvazimatlarda artım müşahidə olunur.

Bu gün ölkəmizdə sosial təminatı aşağı olan ailələr övladının məktəb ehtiyaclarını qarşılaya bilmir. Qiymətlərdə ucuzlaşma olsa da, buna məktəb formaları da daxildir. Bu baxımdan Azərbaycanda sosial təminatı aşağı olan ailələrin övladlarına məktəb formaları pulsuz verilə bilər?

Mövzu ilə bağlı Sonxeber.az-a danışan Sosial Tədqiqatlar Mərkəzinin əməkdaşı, təhsil tədqiqatçısı Elmin Nuri bildirib ki, hər il məktəblərin başlanması ərəfəsində məktəbli formaları, məktəb ləvazimatları kimi mövzular gündəmə gəlir:
"Burada sosial təminatı zəif olan ailələr üçün bu cür imtiyazların olması kimi istiqamətlər mətbuatda və sosial şəbəkələrdə müzakirə olunur. Düşünürəm ki, bu müzakirə üçün problem xarakterli məsələ deyil. Yəni bu həyata keçirilməsi baxımından çoxdan ediləcək bir məsələ idi. Vahid məktəbli formaları ödənişlidir. Valideynlər hər il öz övladları üçün məktəbli forması almalıdır. Bunun özü ayrıca bir vəsaitdir. Elə məktəbli ləvazimatları var ki, bu əlavə vəsait tələb edir. Ola bilsin ki, bu kimin üçünsə problem kimi görünməyə bilər. Bu gün sosial vəziyyəti aşağı olan elə ailələrimiz var ki, onlar üçün övladlarını məktəbə yola salmaq həqiqətən böyük problemə çevrilir".

Ekspertin sözlərinə görə, xarici ölkələrdə sosial təminatı aşağı olan ailələr üçün müxtəlif təcrübələr var. Həmin ailələr məktəb, dövlət yaxud yerli inzibati orqanlar tərəfindən müəyyən güzəştlər ilə təmin olunur:

"Mən də düşünürəm ki, bu cür ailələrə belə güzəştlər paketi olmalıdır. Məsələn bir məktəb tərəfindən həmin təhsil müəssisəsində oxuyan şagirdlərin arasından sosial təminatı zəif, valideynlərin heç birisinin rəsmi işi olmayan, valideynlər bir yaxud ikisinin əlillik dərəcəsi olan və digər problemlər ilə əmək qabiliyyətini itirmiş valideyni olan şəxslərin siyahısı hazırlanmalıdır. Həmin siyahı əsasında şagirdlərə müəyyən yardımlar olunmalıdır. Biz bunu edə bilərik. Zaman-zaman bu yardımlar edilib. Müəyyən fondlar tərəfindən yardımlar həyata keçirilib. Müəyyən cəmiyyət və QHT-lər tərəfindən layihələr təşkil edilib. Fərdi şəxslərin, özəl şirkətlərin və biznes obyektləri tərəfindən belə yardımlar göstərilib".

Elmin Nuri qeyd edib ki, bununla əlaqədar daha sistemli və mərkəzləşdirilmiş proqram olsa çox yaxşı olar:

"Bunu sentyabr ayının əvvəllərində daha bariz nümunəsini görəcəyik. Həqiqətən müəyyən xərc tələb edən bir prosesdir. Ona görə də hər şeyi dövlətin üzərinə yıxmayaq. Dövlətə dəstək ola biləcək xüsusi layihələr olmaldır. Müəyyən fondlar, müstəqil cəmiyyətlər və mərkəz bu istiqamətdə layihələr ilə çıxış etməlidir. Böyük şirkətlər özlərinin sosial sərmayələr paketinə bunu əlavə etməlidir. Tutaq ki, X adlı böyük bir şirkət özü üçün 10 məktəb limitini seçməlidir. Həmin məktəbdə bu cür sosial cəhətdən ağır ailələrə məxsus uşaqlar üçün müəyyən yardım kampaniyası həyata keçirməlidir. Bu həm də bizim təhsilimizə dəstəkdir. Qaldırılan mövzu təhsildən çox, sosial problemdir. Amma bu cür addımların atılması bizim üçün mənəvi və maarifçilik baxımından gözəl bir iş ola bilər".

Sevda Səfərova

Telegramda izləyin