Azərbaycanda meşə yanğınlarının baş verməsi GÖZLƏNİLİR? - AÇIQLAMA

Türkiyənin meşə yanğınları baş verən bütün bölgələrində alovla mübarizə davam edir. Türkiyənin İzmir, Aydın, Bolu, Manisa, Karabük və Uşak vilayətlərində helikopterlər də cəlb edilməklə yanğınlara qarşı mübarizə aparılıb. Səhərdən başlayaraq isə altı vilayətin səkkiz bölgəsində alovla mübarizə tədbirləri idaha da intensivləşdirilib.Ölkənin bütün qurumlarının aidiyyəti orqanları hadisə bölgələrinə səfərbər olunub. Yanğın bölgələrindən indiyədək 3971 nəfər təxliyə olunub. Ölkə üzrə yanğınlarla bağlı yeddi nəfər saxlanılıb, onlardan ikisi həbs edilib.

Yanğın təhlükəsizliyi qaydalarına əməl olunmaması və meşə zonalarına tullantıların atılması yanğın riskini artırır. Günəş şüalarından yarana biləcək istilik meşə yanğınlarına təkan verən amillərdəndir. Bəs Azərbaycanda meşə yanğınlarının baş verməsi gözləniləndir?

Mövzu ilə bağlı Sonxeber.az-a danışan təhlükəsizlik məsələləri üzrə ekspert Elmar Nuraliyev deyib ki, meşə yanğınlarının baş verməsinin əsas səbəbi insan amilidir:

"Ona görə də bütün təsərrüfat sahibləri, meşə zonasında yerləşən fərdi yaşayış evləri və istirahət mərkəzləri, meşə ərazilərdə istirahət edən şəxslər mütləq şəkildə yanğın təhlükəsizliyi qaydalarına əməl etməlidirlər. Açıq oddan istifadə edilməməlidir. Əgər buna lüzum varsa, odun tam sönməsinə əmin olmaq lazımdır və ondan sonra ərazi tərk edilməlidir. Meşə yanğınlarının statistikasının əksəriyyəti insan məsuliyyətsizliyinin payına düşür".

Ekspertin sözlərinə görə, ondan sonra meşə əraziləri təmiz saxlanmalıdır. Ərazi çirkli olarsa, məişət tullantıları meşə zonasında mövcuddursa günəş şüalarından yaranan istilik yanğınlara səbəb ola bilər:

"İnsanlar meşə ərazilərində piknik etdikdən sonra ətraf ərazilərə tullantılar atırlar. Bütün bunlar yanğınlara səbəb ola bilər. Şüşə qırıntısı və yaxud taxta, karton üzərində yarana biləcək istilik alışmaya gətirib çıxara bilir. Meşə yanğınlarından heç kim sığortalanmayıb. Yanğın təhlükəsizliyi qaydalarına əməl etmək lazımdır. Burada həm də insan sağlamlığından söhbət gedir. Burada insanların əmlakına, həm də ekologiyaya ciddi zərər dəyir".

Qeyd edək ki, Prezident İlham Əliyevin tapşırığına uyğun olaraq, Azərbaycanın Fövqəladə Hallar Nazirliyinin (FHN) Aviasiya dəstəsinin "BE-200ÇS" tipli amfibiya təyyarəsi də ən şiddətli yanğınların baş verdiyi bölgələrdən olan İzmirdə söndürmə işlərinə dəstək məqsədilə Türkiyəyə gəlib.

Telegramda izləyin