Uşaq dünyaya gətirmək üçün evlilik şərtdirmi ? - AÇIQLAMA

Bakıda nikah kağızı olmayan xəstəni doğum evinə buraxmayıblar. Bu barədə məlumat sosial şəbəkədə yayılıb.

Məlumatda bildirilir ki, dünyaya uşaq gətirməkdə olan qadın Bakıxanov qəsəbəsindəki doğum evinə aparılıb. Lakin qadını xəstəxananın qapısından içəri buraxmayıblar. Doğum evi qadından nikah haqqında şəhadətnamə tələb edib. Bildirib ki, nikah haqqında şəhadətnamə olmadan xəstə qəbul olunmayacaq. Xəstənin yaxınları nikah haqqında şəhadətnaməni gətirəndən sonra onu xəstaxanaya götürüblər.

Bəs görəsən uşaq dünyaya gətirmək üçün evlilik şərtdirmi ?

Mövzu barədə sosioloq Lalə Mehral Sonxeber.az – a açıqlamasında bildirib ki, nikahdankənar uşaq dünyaya gətirmək ailə insitutunu təhlükəyə salan problemlərdən biridir:

"Bu problem o qədər böyüyüb ki, artıq cəmiyyətin problemi olmaqdan çıxıb, dövlətin problemi olub. Ölkədə nikahdankənar dünyaya uşaq gətirən qadınların sayı ciddi formada artır. Bununla bağlı bir ölçü götürülməlidir. Vətəndaş nikahları ilə bağlı ciddi formada qadağalar tətbiq edilməlidir. Əgər bu vəziyyət belə davam eləsə, onsuz da boşanmalara və nikah azlığına görə ciddi təhlükədə olan ailə insitutu nikahdankənar doğuma görə daha böyük təhlükə altına düşəcək.

Bu ilin statistikasına nəzər yetirsək görərik ki, ölkədə ciddi formada boşanma faciəsi yaşanır. Nikahların azlığı demoqrafiyanı ciddi şəkildə təhlükə altına salır. Əgər nikahlar bağlanmasa, nəsil artımı baş verməsə, boşanmaların sayı azalmasa, ailə insitutundakı vəziyyəti təsəvvür eləmək belə çox çətindir. Nikahdankənar doğulan uşaqlar - hansı ki, buna daha humanist görünsün deyə vətəndaş nikahı, sivil ailə adı qoyublar - bütün hallarda normal deyil. Əgər bir uşağı dünyaya gətirirsənsə, onun cəmiyyətdəki gələcək statusunu, adının qarşısına yazılacaq ata adını da fikirləşməlisən. Ona sənəd alanda, rəsmi prosedurlar keçəndə, məktəbdə oxuyanda, cəmiyyətə adaptasiya olanda yaşayacağı çətinlikləri fikirləşmək lazımdır. Vətəndaş nikahı adı verib, bəzəyib-düzəyib bunu yumşaltmağın o körpənin gələcəkdə yaşayacağı çətinliklərə heç bir köməyi olmayacaq. Ona görə də qanuni formada nikah bağlayıb, daha sonra dünyaya uşaq gətirmək məqbuldur" .
Çiçək Sadatova

Telegramda izləyin