Müəllimlər niyə daha çox Bakıda İŞLƏMƏK İSTƏYİRLƏR? - AÇIQLAMA

Bildiyimiz kimi, müəllimlərin işə qəbulu üzrə müsabiqənin müsahibə mərhələsi davam edir. Müsahibə zamanı namizədlərin peşəkar kompetensiyaları, psixoloji hazırlığı və ümumi dünyagörüşü müsahibə proqramına uyğun olaraq müvafiq komissiya tərəfindən yoxlanılır. Məktəblərdə müəllim işləmək istəyənlər isə daha çox Bakı şəhərinə üstünlük verirlər. Bölgələrdə düşən müəllimlər ya nəticədən imtina edir, ya da proses adapyasiya olmağa çalışır.

Bakı şəhəri üzrə vakansiyalara müraciət edən müəllimlərin sayı çox olduğuna görə, rəqabətdə güclü olur. Belə bir fikir formalaşıb ki, yüksək bal toplayan müəllim Bakıda, aşağı nəticə göstərən müəllim isə rayonlarda işləməlidir. Bu nə dərəcədə doğrudur?

Mövzunu Sonxeber.az-a şərh edən təhsil məsələləri üzrə ekspert İlqar Orucov deyib ki, Son illərdə bu tendensiya müşahidə olunmaqdadır. O, bildirib ki, şəhərdə vakansiya çıxarılan yerlərə müraciət edənlər daha çox yüksək bal toplayan müəllimlərdir:

"Bu müəllimlər başqa bir bölgədən Bakıda işləmək üçün gəlmək istəyən müəllim deyil. Bakı şəhəri üzrə daha çox müəllim vakansiyada iştirak etdiyi üçün rəqabət güclənir. Nəzərə alaq ki, Bakı son illər daha çox yüklənib. Azərbaycan əhalisinin əksəriyyəti qeyri-rəsmi olsa da yarısı şəhərdə yaşayır. Ölkəmizdə 1500 məktəb var. Onun 400 və daha çoxu Bakı şəhərində yerləşir. Əhalinin məskunlaşması isə daha çox Bakı şəhərindədir. Bu baxımdan Bakı şəhəri üzrə yerləşən məktəblərdə keçid balı yüksək olur. Ucqarlara isə az bal toplayan müəllimlər müraciət edir. Bu bir reallıqdır. Müşahidələrim onu deməyə əsas verir ki, gənc müəllimlər bölgələrin ucqar kəndlərində işləməyə gedir. Bu zaman fərqli bir mühitə düşür və kənd infrastrukturu olduğu üçün asudə vaxt keçirməyə imkanları olmur".

Ekspertin sözlərinə görə, müəllimlər bəzən həmin kənddə məskunlaşanda insanlar ilə ünsiyyət qurmaqda çətin çəkir:

"Kənd adamının bəlli bir məşğuliyyəti var. Dövlət ucqar kənddə işləməyə gedən müəllimlər üçün yardımlar və əlavə ödənişlər edir. Onların müəyyən kommunal xərcləri qarşılanır. Amma buna baxmayaraq, həmin müəllimlər bu mühitə alışa bilmir. Elm və Təhsil Nazirliyi bu istiqamətdə müəyyən addımlar atır. Atılan addımlar həmin müəllimlərin imtina etməsinin qarşısını almağa yönəlib. Eyni zamanda müəllimlər etdikləri seçimlərin məsuliyyətini dərk etməlidirlər. Digər tərəfdən müəllimlər düşünür ki, insanların şəhərdə maddi baxımdan vəziyyəti daha yaxşı olur. Müəllim öz işi ilə birlikdə repetitorluq fəaliyyətini rahat təşkil edə biləcəyini düşünür. Repetitorluq rayonlarda 20 manatdırsa, şəhərdə bu xidmət daha yüksəkdir. Ona görə də şəhərdə bu işlə məşğul olmağı daha üstün tuturlar. Belə situasiyalar mövcuddur".

Sevda Səfərova

Telegramda izləyin