"Bu gün Azərbaycan-Özbəkistan əlaqələri yeni dövrün reallıqlarına uyğun sürətlə inkişaf etdirilir" - DEPUTAT

"Cənab prezident İlham Əliyevin həyata keçirdiyi uğurlu xarici siyasət Azərbaycanın qonşu dövlətlərlə, eləcə də, Mərkəzi Asiya ölkələri ilə ikitərəfli əlaqələrin sürətli inkişafına təkan verir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Özbəkistanla əlaqələr dövlətimiz üçün mühüm əhəmiyyət kəsb edir:

"İki ölkə başçısının rəsmi səfərləri, imzalanan sənədlər dövlətlərarası dostluğun, qardaşlığın artmasına və əlaqələrin getdikcə daha da möhkəmlənməsinə səbəb olur. Azərbaycan-Özbəkistan xalqlarını yaxın milli adət-ənənələr, ümumi dil qrupu, mədəniyyət və din birləşdirir. İki ölkə arasında diplomatik əlaqələr 1995-cü ilin oktyabrın 2-də qurulub. Həmin vaxtdan başlayaraq bu günə qədər iki ölkə arasındakı əlaqələr getdikcə daha da möhkəmlənib".

Deputat vurğulayıb ki, dövlət başçısının Özbəkistan sonuncu səfəri tarixi əhəmiyyət daşıyır:

"Çünki səfər çərçivəsində iki ölkə arasında müttəfiqlik münasibətləri haqqında müqavilə imzalandı. İki ölkə arasında imzalanan müttəfiqlik münasibətləri haqqında müqavilə hesab edirəm ki, ən yüksək beynəlxalq sənəddir. Artıq iki qardaş dövlət rəsmi müttəfiq oldu. Bu hər iki ölkə üçün çox mühüm addımıdır. Çünki bundan sonra münasibətlərimizi və regional siyasəti bu sənəd müəyyən edəcək.

Bu gün Mərkəzi Asiya, Cənubi Qafqaz və Xəzər regionları vahid geosiyasi regiona çevrilir. Regionlarda müsbət proseslərin davam etməsi Azərbaycan-Özbəkistan arasındakı səmərəli əməkdaşlıqdan asılıdır. Hazırda Azərbaycan-Özbəkistan əlaqələrinin yüksək səviyyəyə çatmasında Prezident İlham Əliyevin və Prezident Şavkat Mirziyoyevin şəxsi münasibətləri də həlledici rol oynayır. Təsadüfi deyil ki, hər iki prezident rəsmi səfərlərdən əlavə müxtəlif beynəlxalq tədbirlər çərçivəsində də tez-tez görüşürlər. Bu gün Azərbaycan-Özbəkistan əlaqələri yeni dövrün reallıqlarına uyğun sürətlə inkişaf etdirilir".

Telegramda izləyin