Dr. Aytac Məmmədova: Mehriban Əliyeva insanların sağlamlığına xüsusi diqqət göstərir TƏBRİK

Mehriban xanım Əliyevanın Azərbaycan mədəniyyətinə, təhsilinə, səhiyyəsinə göstərdiyi qayğı və diqqətini bütün dünya görür və yüksək qiymətləndirir. Ölkəmizdən kənarda apardığı xeyriyyəçilik işləri Azərbaycan qadınının humanizm, mərhəmət kimi dəyərlərə malik olduğunu, dövlət strukturlarında, siyasi arenada və digər sahələrdə Azərbaycan qadınının istedadlı mütəxəssis kimi fəallıq göstərdiyini nümayiş etdirir.

Azərbaycanın müasir tarixini yaradan Prezident İlham Əliyevin ən yaxın silahdaşı olan Birinci vitse-prezident Mehriban Əliyeva sosial, humanitar və iqtisadi siyasətin həyata keçirilməsində yeni idarəçilik modeli ortaya qoyub. Dövlət rəhbərinin ömür-gün yoldaşı kimi onun üzərinə daha bir tarixi missiya düşdü. Tariximizdə ilk dəfə olaraq Birinci xanım institutunu formalaşdırdı. Prezident İlham Əliyevin dediyi kimi: "Mehriban Əliyeva çox peşəkar, bilikli, təcrübəli, prinsipial bir insandır, eyni zamanda çox xeyirxah bir insandır və təsadüfi deyil ki, Azərbaycan xalqı ona çox böyük rəğbətlə, sevgi ilə yanaşır".

Mehriban xanımın humanist fəaliyyəti təhsillə yanaşı, səhiyyə sahəsini də əhatə edir. Təkcə Azərbaycan əhalisinin deyil, dünya əhalisinin də sağlamlığının qorunması daim Mehriban xanım Əliyevanın fəaliyyətinin əsasında dayanır. Sağlamlığın qorunması istiqamətində beynəlxalq tədbirlər çərçivəsində Heydər Əliyev Fondu Dünya Diabet Günü kampaniyasına qoşulub, əhalinin sağlamlığının qorunması, xüsusilə uşaqların fiziki cəhətdən sağlam böyüməsinə lazımi səviyyədə diqqət yetirilməsi üçün "Talassemiyasız həyat naminə" layihəsini icra etməyə başlayıb. Bundan əlavə, 2010-cu ildə Heydər Əliyev Fondunun UNICEF-in birgə keçirdiyi anemiya və talassemiya üzrə dəyirmi masada bu istiqamətdə bir çox mühüm problemlər müzakirə olunub.
Mehriban xanımın dünya miqyasında humanitar fəaliyyəti beynəlxalq səviyyədə də yüksək qiymətləndirilir. Belə ki, Ümumdünya Səhiyyə Təşkilatı İcraiyyə Komitəsinin 2007-ci il yanvarın 29-da Cenevrədə keçirilən 120-ci sessiyasının yekdil qərarı ilə ana, uşaq və ailə sağlamlığının qorunması və möhkəmlənməsi işində müstəsna xidmətlərinə görə Mehriban xanım Əliyeva bu beynəlxalq təşkilatın "Qızıl ürək" ali mükafatına layiq görülüb. Beynəlxalq təşkilatların digər təltifləri arasında UNESCO-nun "Qızıl Motsart" medalı, BMT-nin Ümumdünya Əqli Mülkiyyət Təşkilatının Qızıl medalı, Krans Montana Forumunun Qızıl medalı və "Prix de la Fondation" mükafatı, Avropa Olimpiya Komitələrinin Ali Ordeni, Beynəlxalq Ədalətli Oyunlar Komitəsinin "Xüsusi xidmətlərə görə" medalı, Nizami Gəncəvi Beynəlxalq Mərkəzinin Qızıl medalı, Beynəlxalq Olimpiya Akademiyasının "Olympic Excellence" xüsusi fəxri mükafatı, Türk-Alman Dostluq Federasiyasının fəxri mükafatını sadalamaq olar.
Ölkə həyatında yüksək fəallıq göstərən Mehriban Əliyevanın Azərbaycan mədəniyyətinə, təhsilinə, səhiyyəsinə göstərdiyi qayğı və diqqətini bütün dünya görür və yüksək qiymətləndirir. Bu gün Mehriban xanım Əliyevanın gördüyü işlərin sədası dünyanın ən nüfuzlu mətbu orqanlarının səhifələrində yer alıb. Ölkəmizdən kənarda apardığı xeyriyyəçilik işləri Azərbaycan qadınının humanizm, mərhəmət kimi dəyərlərə malik olduğunu, dövlət strukturlarında, siyasi arenada və digər sahələrdə Azərbaycan qadınının istedadlı mütəxəssis kimi fəallıq göstərdiyini nümayiş etdirir.
O, bütün bunları sevərək, Azərbaycanı, onun gələcəyini düşündüyü üçün edir. Mehriban xanım Əliyeva deyir: "Mən konkret iş görmək, konkret insanlara kömək etmək istəyirəm. Konkret problemləri həll edə, yardım edə bildikdə sevinc hissi keçirmək və səndən asılı olmayan səbəblər üzündən nə isə edə bilməyəndə təəssüflənmək, qəzavü-qədər, sağalmaz xəstəlik qarşısında bütün gücsüzlüyümü dərk edərkən əziyyət çəkmək, xilas edilmiş bir uşağın təbəssümünü gördükdə isə bir daha sevinmək istəyirəm. Bu, mənim seçimimdir...".
Bu fikrlərdən tam aydın görmək olur ki, dəyərli Mehriban xanımın həyat və fəaliyyəti bütünlüklə Azərbaycana və Azərbaycançılıq məfkurəsinə aitdir. Onun ictimai-siyasi, olduqca zəngin və çoxşaxəli fəaliyyəti hər bir Azərbaycan qadınına örnəkdir.

Bu gün yeri gəlmişkən dövlətimizə və xalqımıza ləyaqətlə xidmət edən dəyərli Mehriban xanım Əliyevanın doğum günüdür. Bu münasibətilə səmimi qəlbdən təbrik edir, Ona möhkəm can sağlığı, uzun ömür, əbədi xoşbəxtlik diləyirəm.

Hörmətlə,
Dr.Aytac Məmmədova
Cərrah -onkoloq

Telegramda izləyin