Ölkədaxili miqrasiyanın qarşısını necə almalı ? - AÇIQLAMA

Bakıda getdikcə artan problemlərdən biri də insan sıxlığıdır. Bunun əsas səbəblərindən biri də paytaxta bölgələrdən kütləvi axının olmasıdır. Bəs görəsən regionlarda yaşayan əhalinin Bakıya axın etməsinin səbəbi nədir ?

Mövzu ilə bağlı Sonxeber.az -a açıqlama verən Sağlam Cəmiyyət Hərəkatının rəhbəri, sosioloq Elçin Bayramlı bildirib ki, bunun əsas səbəbi regionlarda işsizliyin artmasıdır:

Elçin Bayramlı vurğulayıb ki, hazırda Republika əhalisinin təxminən 50 faizi Bakı-Abşeron yarımadasında cəmləşib. Bu, əsasən sosial-iqtisadi faktorlarla bağlıdır:

"İşsizlik və gəlir bərabərsizliyi üzündəndir. SSRİ dövründə bizim 7 milyon əhalimiz var idi. Bunun 1 milyon yarımı Bakıda, digərləri regionlarda yaşayırdı. Çünki ölkənin bütün regionları təxminən eyni dərəcədə həyat şəraiti ilə təmin olunmuşdu. 90-cı illərdə SSRİ-nin dağılması nəticəsində iqtisadi xaos yarandı. Bütün fabrik və zavodlar fəaliyyyətini dayandırdı. Regionların əhalisi ağır vəziyyətə düşdü. Beləliklə Bakıya köç prosesi başladı. Həmin dövrdə məcburi köçkünlər də Bakıya üz tutdular. Bakının əhalisi 2-3 dəfə artdı. Əhalinin regionlarda işsiz qamasl gəlir əldə edə bilməməsi ağır həyat şəraitləri məcbur elədi ki, onlar yaşamaq üçün paytaxta üz tutsunlar. Çünki burda iş tapmaq, gəlir əldə etmək imkanları var. Regionlarda isə bu çox çətindir. Bir çoxunda isə demək olar ki, yoxdur. Ölkə əhalisinin böyük qisminin paytaxta dolması çox ağır bir vəziyyətdir. Burda iqtisadi disbalans var. Təkcə Bakı ölkə iqtisadiyyatının 70 faizini təmin edir. Bu o deməkdir ki regionlarda tənəzzül gedir".

Bəs bunun qarşısını almaq üçün hansı addımlar atılmalıdır ?

"Bu prosesin qarşısını almaq üçün dövlət ciddi tədbirlər görməlidir. Bütün böyük müəissiələr, Ali məktəblərin əksəriyyəti Bakıdadır. Oxumağa gələn tələbələr universiteti bitirəndən sonra rayona qayıtmır. Çünki bilir ki, orda iş tapa bilməyəcək. Hökumət regionların inkişafına yönəlməlidir. Bunun üçün mailiyyə ayrılmalıdır. Regionlarda zavod, fabriklər açılmalıdır. Təsərüfatın inkişafına dəstək verilməlidir. Bunun üçün bizim kifayəq qədər imkanlarımız da var. Əgər mailiyyə ayrılsa, lazimi addımlar atılsa, əhalinin regionlara geri axını da təbii şəkildə baş verəcək. Dövlət bu məsələ ilə ciddi məşğul olmalıdır. Əhalinin regionlar üzrə yerləşdirilməsini düzgün şəkildə təmin etməlidir. Regionların sosial-iqtisadi inkişafını artırmaq lazımdır ki, ölkə tarazlı inkişaf eləsin. Ölkənin bir hissəsi hər tərəfli inkişaf edib, digər hissəsi tənəzzül edirsə, bu, həmin ölkə üçün utanverici bir haldır".

Çiçək Sadatova

Telegramda izləyin